Svmer ist nv gar zergan

Svmer ist nv gar zergan geswigen sint dú vogellin des mv̊s ich vil trurig stan vnd in dem herzen iamerc sin winter vnd ein ander leit dú gebent mir ofte senden mv̊t si hant mir leider beide widerseit

Svmers sol man sin gemeit so mag ein man der frowen sin wol mit dienste sin bereit vil selig si sin liehter schin winter ich bin dir gehas da bi der svmer wunne holt so mac man werden frǒwen dienen bas

Zwú sol mir des winters zit vnde ǒch dar zv̊ sin lengú naht an der al min fröide lit dú hat des leider niht gedaht dc sich ende so min strit als einem dem so wol geschiht der bi liebe lieblich lit

Sit man leit nach liebe hat so sol ǒch lieb nach leide ergan min lib noch in leide stat des ist mir endelos min wan frowe wende so min leit dc mir nach leide lieb gescheh min herze bi den fröiden iamer treit

Frǒwe liebú frǒwe min war vmbe bist dv mir gehas ich was ie der dienest din dc weis got wol vnd nieman bas dc ich von dir minen mv̊t noch nie gewante sit der zit dc ich verstv̊nt beidú v́bel vnd gv̊t