Svmer var

Svmer var ist nv gar heide velt· anger walt hie vnd da wis rot bla gel brvn grün wol gestalt wunneklich fröiden rich ist gar swc dv́ erde treit selig man swer so kan dienen dc sin arbeit in liebe leit

Swem got git dc er lit bi liebe der mac wol sin svnder leit im ist bereit zaller zit meien schin im ist wol swanne er sol spiln der minne fröiden spil fröiden leben kan wol geben werdú minne swem si wil si hat sin vil

Swem ein wib sinen lib minneklich vmbevat ob der niht selden giht dc ist grôs missetat im ist geschehen wil ers iehen da von im wirt truren kranc svnder meil ist sin heil swem von linden armen blanc wirt vmbevanc

Selden hort ist ein wort dc in kvssen geschiht so ir spil minnen wil spiln vnd lieb bi liebe siht ob da jcht ǒgen liht lieblich sehen ein ander an ia fúr war da wirt gar minneklichen wol getan swas ieman kan

Minnen solt wirt geholt vollekliche da ein man vnd ein wib vmb ir lib lâssent viere arme gan deke blos fröide gros wirt da beidenthalben kvnt ob da niht me geschiht klein vel hitze roter mvnt wirt minnen fvnt dar nach gefvnt