Svmerlichú wunne

Svmerlichú wunne zieret wol den grünen plan berg vnd tal· sint bekleit nach dem tǒwe svnne meijen disú kleider sneit svnder wan· vber al swer wil bla rot grün gel schowen vf dem anger in den ǒwen der siht da wunnen vil Minne twinget mir den sin wiblich güte· min gemüte zuket hin

Swie vil meije bringet fröiden vnd sin liehten tage doch trure ich von der not dc mich minne twinget vnd der lieben mvnt so rot dest min klage· sicherlich ich han ir den mv̊t erzeiget dc sich ir gebot neiget alse min gir· svnder wan Minne twinget mir den sin wiblich güte· min gemüte zuket hin

Mir ist wol ze mv̊te swenne ich die vil lieben sihe alle zit dvr dc iar dú vil reiie gv̊te tv̊t mich truren dc ist war ich vergihe svnder strit so si tůt· der not geliche sam ich trure herzekliche sost min mv̊t· fröiden fri Minne twinget mir den sin wiblich güte· min gemüte zuket hin

Lieb la liebe werben lieblich zwischent mir vnd dir lieb la mich liep dir sin la lieb niht verderben liep vnd tv̊ mir helfe schin frowe mir· minneklich ich bin ir so gar gebvnden dú mich twinget zallen stvnden dc si mir niht den sin Minne· twinget mir den sin wiblich güte· min gemüte zuket hin

Zvht vnd ellú schöne hat min frowe ach selig wip wiblich scham ǒch da bi fúrbas ich si kröne sist vor missewende vri lieben lip ob alsam