Swie gerne ich were

Swie gerne ich were gar fröidebere so enlat mich swere klagt ein magt die man sint schúllen wer kans erfúllen die fvlen gúllen gar verzagt wurde ein iung man vmb ein wib swa si dc horten an allen orten mit bösen worten sis zerstorten got der schende ir lip

Si sprach mich wundert dc vnder hvndert niht vs besvndert ist ein man der wibes ere nah zúhten lere mit willen mere nv sehet an si sint endelich allesamt bi den wiben swere de lůterere sint rümesere vnd vns gevere vnd gar verschamt

Hie vor gab minne fröide gewinne dem mannes sinne dur dc iar swer si nv sv̊chet als ir gerůchet der ist verflůchet dest leider war est ein arges minnerlin sprechent nv die ivngen die hie vor svngen nach ere rvngen die sint verdrvngen dest worden schin