Tǒgenlichen lag verborgen

Tǒgenlichen lag verborgen bi liebe ein riter wol gemv̊t da von pflag der wahter sorgen er sang swer hie lit vm behv̊t ob der behalten wil den sinen lip so weke in minneklichen reine wib er ist ze lange hie gelegen da von so gebe er dir den morgen segen

Des erschrag dv́ minnekliche si daht owe der leiden zit erst entslafen senftekliche der hie an minem arme lit den wil der liehte tag von mir veriagen da von mv̊s ich an fröiden gar verzagen si kvst in slafent an den mvnt vnd sprach der wahter tůt den morgen kvnt

Da wart ir der kvs vergolten ein widerkússen da geschach Ach si lagen als si solten dv́ frowe vs rotem mvnde sprach tv̊ ritters ere an mir vil senden schin er sprach vil herze liebe frowe min ich wil dir minne fröide lan sich lieb dv́ sol dir hie ze pfande stan