Winter wil vns aber twingen

Winter wil vns aber twingen heide vnd ǒch den grünen kle in dem walde vogelin singen tůnt die kalden winde we doch swie kranc der svmer were wint ist so fröiden lere dc er birt noch grosser swere mir wer liep das vns verbere rife vnd ǒch der kalde sne Frowe min ich wil din diener sin

Ach wc klage ich sender tvmmer sit noch grosser ist min not ich lide al ze grossen kvmmer sit dú minne mir gebot dienen also reinem wibe wol ir minneklichen libe Ob si fröide mir beschibe vnd die swere mir vertribe mit ir liehten mv́ndel rot Frowe min ich wil din diener sin

Wunneklichen ǒgen blike hant dc herze min gewunt die mich smahent also dike da von ist mir sorgen kvnt so si loslich von mir swenket vnd mich in den iamer senket vnd mich an den fröiden krenket vnd min herze in rúwe ertrenket dc geschiht mir tvsent stunt Frowe min ich wil din diener sin

Minne twinget âne schulde mich vil senden siechen man wan ich warb ie nach ir hulde dc ich růwe nie gewan minne liebes fügerinne ach war tůst dv dine sinne dien ich dir nah vngewinne so bist dv gen mir vnminne sid ich dienen dir began Frowe min ich wil din diener sin

Dú vil gůte vnd dú vil reine minneklich wol gezogen hat niht bresten wan ein kleine fúr die warheit vngelogen sist gen mir ein teil ze here in weis da niht wandels mere swar ich doch der lande kere so gib ich ir pris vnd ere si ist an tvgenden vnbetrogen Frowe min ich wil din diener sin