Svmerwunne ist hin gekeret

Svmerwunne ist hin gekeret winter wil begrifen liehte blv̊me vnd den kle kleine vogelin sint verseret von den kalten rifen da bi siht man ǒch den sne owe minneklicher ǒgenweide die man sach vf anger vnd vf heide die stant nv in leide dc tv̊t minem herzen we Sol min herze fro bestan so mv̊s minne mine sinne rv̊wen lan

Owe súfteberer sorgen dv́ min herze twinget ach ich fröideloser man die trage ich vil vnverborgen sit min herze ringet dar nach des mir minne erban in weis noch niht was dv́ minne richet dc si mine fröide so zerbrichet sit min zvnge ir sprichet niht wans beste so ich kan Sol min herze fro bestan so mv̊s minne mine sinne rv̊wen lan

Lieb in herzen lieb in ǒgen lieb in minen sinnen lieb vor valsche wol behv̊t lieb in liebe svnder lǒgen lieb ich mv̊s dich minnen swie mir din genade tv̊t liebes lieb dv hast mich mit gewalte lieblich braht in sorge manigvalte liebes lieb nv walte liebe gegen mir frowe gv̊t Sol min herze fro bestan so mv̊s minne mine sinne rv̊wen lan

Gv̊t gebaren schön an libe hat div minnekliche kv́sche in herzen svnder wan wer gesach an keinem wibe dv́ sich ir geliche vnd die tvgende möhte han der si pfliget min frowe vnwandelbere alle frowen lassen ane swere es sint warú mere der mv̊s ich ir bi gestan Sol min herze fro bestan so mv̊s minne mine sinne rv̊wen lan

Es ist dike das gesprochen swer gewaltig were der solt doch genedig sin dis reht ist an mir gebrochen dv́ vil seldenbere dú ist gar gewaltig min vnd han doch genade da niht fvnden wan ir trost ist gegen mir gar verswunden dv́ mir zallen stvnden tv̊t ir vngenade schin Sol min herze fro bestan so mv̊s minne mine sinne rv̊wen lan