Admirant voz beaux yeux, je raisonnois ainsi

 Admirant voz beaux yeux ie raisonnois ainsi : Quel miracle est ceci ? ie ne le puis comprendre, Mon cœur est un glaçon & se reduit en cendre, Ie n’ai point offencé, & ie crie merci :  Ie suis d’un seul regard & joyeux & transi, Amour, enseigne moi, que ie le puisse entendre : C’est raison, dit Amour, ie te le veux apprendre. Esleue ton penser & escoute ceci.  Ie suis le dieu des dieux, qui couvai tout le monde, Qui assemblai le feu, la terre, l’air & l’onde, Qui domptai le desordre auec mes dards pointus ;  Ie suis celui qui tiens la paix & les allarmes, Qui me pais de plaisirs & me saoule de larmes, Et les yeux que tu vois sont toutes mes vertus.

A. D. V.