Cruelle, respondez, prononcez la sentence

 Cruelle, respondez prononcez la sentence, Et ne me geinez plus auec tant de longueurs, Si ma mort est la fin de voz fieres rigueurs, Que ie meure soudain sans auoir faict offence :  Donnez moy seulement pour toute recompence De vous auoir aimée auec tant de langueurs, De vous avoir seruie auec tant de vigueurs, Que ie meure present en vostre souuenance.  Et quand on vous dira l’histoire de ma fin, Honorez d’un souspir l’aigreur de mon destin, Comme si par ma mort vous estiez adoucie.  Mais las ! ne iettez point de larmes de vostre œil, Ie seroi trop marri de troubler au cercueil L’œil que i’eus tant de peur de troubler en ma vie.

A. D. V.