Non, non, je ne croi point ces traistres mes deux yeux

 Non, non, ie ne croi point ces traistres mes deux yeux, Non ie ne vous croi point, oreilles infideles, Ie cognoi trop mon cœur pour croire ces nouvelles, Allez, n’en parlez plus, vous estes furieux.  Vous m’avez ia perdus, enfans iniurieux, Et vous souffrez les forets des furies bourrelles, Voiez, oiez, croiez des amitiez nouvelles ; C’est Oreste qui void deux Soleils dans les cieux.  Taisez-vous, ie croi plus le faux que dit ma belle, Que ie ne croi le vrai qui tesmoigne contre elle Ne vous rebellez point contre vostre vainqueur.  Que pourriez-vous gaigner estant chargez de chaisnes, Si libres & armez voz forces furent vaines, Quand il fust question d’esprouuer la vigueur ?

A. D. V.