Vous estes un fleuron qui ne fait que s’espandre

Vous estes vn fleuron qui ne fait que s’espandre,  Croissant sur le buisson dont ie suis rudoié :  Vous estes le beau fruict de ce chãp fouldroié,  Qui plustost que seruir s’escoule tout en cendre : Vous estes ceste voix que je ne puis entendre,  Sans me voir tout soudain cruellement noié :  Et vous estes l’esclat dont ie suis pouldroié,  Auant qu’auoir pensé si ie me doy defendre : Bref, vous estes l’enfer affamé de mes pleurs,  Qui ne vous saoulez point de mes sanglans malheurs,  Enfer que ie cheris sur la ioye immortelle : Or aduisez, bons dieux, comment ie vis ici,  Faisant vn Paradis d’vn Enfer sans merci,  Ce viure n’est-il pas vne mort eternelle ?

A. D. V.