Per fagh vedè e toccà propi con man

Per fagh vedè e toccà propi con man Che, anch senza vess nassuu in d’on’aria fina E avè tettaa de bajla firentina, Se pò fass fœura i busch anca in Milan,

Ch’el me sporgia on poo chì, sur Don Giavan, El fregaœucc de quella soa manina, E ch’el tocca, ch’el studia e ch’el compina Sti pocch donzenn de nomm italian.

S’el leggiarà polit cont attenzion, E se de gionta el vorarà notá Sti nomm sul mennabò Ji citazion,

Sur Don Giavanin d’or, ch’el lassa fà Che ghe mettaroo insemma on regalon Ch’el vorarà stantà a portall a cà. Prest donch ch’el vegna za,

Leggemm: Letteratura: Muss, Gigee, Rivola, Castion, Magg, Balestree, Litta, Tanz, Borromee,

Setalla, Ripamont, Gian Marlian, Carchen, Maggenta, Ajrold, Venust, Cardan, Ferrari Ottavian,

Castion d’Alfons, Berchet, Scott, Purisell, Peregh, Manzon, Luin, Pozzobonell, Gianella, Gambarell,

Torti, Panigarœu, Bellott, Parin, Verr Lissander, Oltrocch, Rejna, Venin. Storia: Sass, Calch, Giulin,

Verr, Simonetta, Cœuri Bernardin. Medesina: Majner, Lanfranch, Baldin, Cros, Concorezz, Tadin,

Salvadegh, Mennaben, Griff, Lampugnan, Duu De Grad, duu Caimm, Manara Alban, Simonetta, Giussan,

Rovida, Della Porta, Castion, Moscati, Pravesin, Casaa, Boldon, Boss, Assander, Siton.

Anatomega: Buzz, Gasper Asell, Carchen, Bianch, Bium, Monteggia, Magistrell, Tron, Cuni, Mazzucchell,

E Riboli, e Palletta, e l’Ospedaa. Chimega: L’Aleman, Monguzz, Poraa. Scienza d’antighitaa:

Trivulz, Ferrari Ottavi e Ottavian, Fumagall, Allegranza, Boss anzian E Cattani Gaitan.

Fisega: Fris, Raccagn, De Regis, Pin. Meccanega: Isimbard, Elli, Sonzin, E Beccaria Ballin.

Argentara: Cardan, Brambilla, Gross, Luccignœu, Scorza, Arsagh, e quel pess gross Del Foppa Caradoss.

Incision: Giusepp Longh e la soa soceula. Archilettura: Bass, Mangon, Vignœula, Solar, Meda, Cagnœula.

Pittura: Cresp, Boltraffi, Bramantin, Melz, Lomazz, Poppa, Zeser Sest, Luin, Pamfil, Oggionn, Figin,

Del Cajro, Michelin, Pepp Boss, Appian, Peregh, Gallear, Sanquiregh, Landrian, Ganna, Levaa, Vaccan.

E in tra i donn la Milesi, la Legnana, La Belleria, la Corneo, la Vedana, L’Olivazza, l’Appiana.

Scultura: Porta, Biff, Fontana, Agraa, Solar, Bambaja. Giusprudenza: Alziaa Papà di dottoraa,

Posteria, Ares, Taegg, Cajmm, Carpan, Manfred Setalla, Gian Luis Toscan, Piroven e Giussan.

Politega: Moron, Verr, Beccaria. Matematega, Calcai, Stronomia: Ceva, Agnesa Maria,

Caravagg, Mazzucchell, Zeser, Carlin, Lece, Cavalier, e on Orian che in fin L’è on lum de vott stoppin.

Milizia: EI gran Trivulz, Melz Luduvigh, Medes, Castald, e Belgiojos Albrigh, E i nost Viscont antigh.

Musega: Cadenazz, Mess, Palladin, Mìnoja, la Grassina, Sant Martin, E Luvis Marchesin.

Diplomazia: El cardinal Moron, Archint, Taverna, Cresp, Melz, Castion E el Boss de Provvision.

Teologia: Moron, Branca, Bonscior, E in Domm on para l’ann dedree del cor, Artegian pœù descor!

Ona motta, on vivee, on mucc, on brovètt; Perfett, arziperfett, plusquam perfett: Basta dì che on Ronchett

L’instrivalla tutt l’ann re e imperator; E che a Londra e a Paris ne fan l’onor De dà la metta a l’or

Coi noster bravi balanzitt nostran, Fabbricaa in st’aria grossa de Milan. Ora, sur Don Giavan,

Che l’ha leggiuu polit, e che l’ha vitt Che sto paes no l’è pœù tanto trist, Ne inscì biott e sprovvitt

De gent che vara tant e quant e lu, Se per modestia noi vœur dì de pu, Ch’ei se tœuva mò su

Inscì a la bona, e senza zerimoni, Quella motta de liber che ghe doni. Lì gh’è dent el Sigoni,

El Siton, el Murator, gh’è l’Argellaa, Tucc in fœuj, stampaa ciar, e ben ligaa; E quist chì, sur Abaa,

Ghe mostraran in tucc i or ch’el stima Tanc olter nomm de omenon de scima, Che in grazia de la rima

E in virtú de la santa discrezion Hoo dovuu per desgrazia in s’ toccasion Lassaj in d’on canton

Infin per la bonne bouche el gh’è on breviari Pien ras e comor de indulgenz plenari. Tolt fœura del Bollari,

De Lissander Segond, Gregori, Urban, E de duu d’olter papa de Milan. E quest chì, Don Giavan,

Speri ch’el ghe farà propi servizi E per l’obblegh ch’el gh’ha de dì l’offizi, E per el benefìzi

De quij sant indulgenz ch’el pò quistass Inscì col stecch in bocca andand a spass; Che l’è mej che struziass

A dragonà, studià, perzepità Per vegnì in cull a tucc, come ch’el fà.