Quand vedessev on pubbleg fonzionari

Quand vedessev on pubbleg fonzionari A scialalla coi fiocch senza vergogna, Disii pur che l’è segn ch’oltra el salari El ghe mett lu del sò quell che besogna.

Quand savessev del franch che a l’incontrari Noi gh’ha del sò che i ball ch’el ne bologna, Allora, senza nanch vess temerari, Disii ch’el gratta senza avegh la rogna.

Quand intrattant ch’el gratta allegrament Vedessev che i sœu capp riden e tasen, Disii pur che le segn che san nient.

Ma quand pœù ve sentissev quej ribrezz, Perchè a dì che san nient l’è on dagh de l’asen, Giustemmela, e disii che fan a mezz.