Scimes, pures, bordocch, centpee, tavan

Scimes, pures, bordocch, centpee, tavan, Camol, mosch, pappatas, vesp, galavron, Formigh, zanzar, scigàd, vermen, scorpion, Consolèv che l’estaa l’è pocch lontan.

Pover bestiolitt! pover badan! Mordinn, sciscenn, secchenn che sii patron; Caghenn in sui pitanz, in sul muson; Cribbienn i pagn, i frutt, la carna, el gran.

Fee pur quell che ve pias, car bestiolitt, Che el manch che possem fà per i vost meret L’è quell de lassav scœud tutti i petitt.

Inscì magara ve vegniss a taj D’andà a quarter d’inverna in del preteret De chi loda l’estaa coi sœu regaj.