Resposta a ona lettera d'on amis

Per l’abbondanza porca bolgirona Che somènen al mond i vers e i rimm, Compatissi el tò pret, mi per el primm, S’el te secca la pippa e s’el tontona.

Magara inscì quell’olter pret mincion Che m’ha insegnaa a zappà in del carimaa, L’avess faa onor al mè prim vers che hoo faa Cont ona bona salva de coppon.

Ch’el m’avarav almanch schivaa l’impicc De scusamm tutt i dì con certe goff Che voraven di rimm su tutt i loff, Ceme se i rimm se fassen cont el ghicc.

Ma adess ch’el maa l’è faa, già l’è tuttuna; Sont vece, e quant a mi gh’è pu rimedi; E in quant a tì, pò dass, ma infin prevedi Ch’el tò sur barba el bajarà a la luna.

Perchè quand no te rivet a desverges De la smania di vers nanch coi bugnon, No cred ch’el possa indutt a la reson S’el drovass anch el manegh de l’asperges.

Intant per el bugnon la provvidenza La t’ha giamò lì bell e preparaa Quatter fraschett de malba, el pan grattaa, £1 lacc, i piumazzitt e la pascienza.

Tant che speri in virtù de sta rizetta De vedett posdoman svelt e spedii A lassà la crosera di ferii Per ciappà post in quella di poetta.