Se on viaggiator el se fudèss propost

Se on viaggiator el se fudèss propost De descriv on paes, puta Milan, E che appenna rivaa al Borgh di Ortolan El fermass la caroccia in del prim ost;

E che là, senza mai mœuves de post, El scrivess giò triff tiaff roba de can Contra i fabbregh, i donn, el ciel, el pian, I costumm e el savè del popol nost;

Costú, domandi mi, saravel somm, Fatov, malign, tambèrla, malcreaa, Birbon, canaja, bestia, oppur on omm?

Ohibò! el sarav fradell de quell’Abaa Che in grazia che nol pò capì on prim tomm, El ne strapazza vundes nanmò faa.