Sissignor, sur marches, lu l'è marches

Sissignor, sur marches, lu l’è marches, Marchesazz, marcheson, marchesonon, E mi sont el sur Carlo milanes, E bott lì senza nanch on strasc d’on don.

Lu el ven luster e bell, e el cress de pes Grattandes con sò comed i mincion, E mi, magher e biott, per famm sti spes Bœugna che menna tutt el dì el fetton.

Lu, senza savè scriv nè savè legg E senza, direv squas, savè descor, El god salamelecch, carezz, cortegg;

E mi (destinon porch) col mè stà su Sui palpee tutt el dì, gh’hoo nanch l’onor D’on salud d’on asnon come l’è lu.