Subet che sevem sett a on tavolin

Subet che sevem sett a on tavolin, E che gh’eva de sott quattordes pee, Come fala mò a dì, sura Lenin, Che i pee che l’han toccada even i mee?

Come fala pœù a damm tant del gingin E del cisquitt che ghe sussiss adree, Quand podarev crepà in man de Ciocchin Se m’è mai soltaa in eoo de pensà a lee!

Sto strapazzamm giugand a induvinà, Cara sura Lenin, l’ha de capì Che ghel poss propi minga perdonà.

A men che l’abbia ditt che sont staa mì A toccalla coi pee, perchè la sa Che coi man già gh’hoo on schivi de no dì.