Solita stoccada de Akmett

A la testa de tutt el battajon Di sœu bisogn, che hin fior de pettulant, EI se presenta Akmett, coi duu ajutant, A cavall di chignceu di sœu calzon.

E chi el protesta a tucc, che i sò intenzion Hin quij de tucc i Roi belligerant: Cioè de paccià e bev e stà d’incant Ai spali (con soa licenza) di mincion.

Donch, se vorii là a mœud d’on omm de pâs, El mej de tutt l’è rendes addrittura E dagh de bon e bon quell che ghe piâs,

Se de nò, col stâ dur e repetà Contra on stoccadoron de sta bravura, Ve toccarà poeù el colp de favv restà.