Par ra Ocajion che el Piovan d' Anpezo Don Agostino Constantini

Presto Ampezzane ch’ el Piovan l’ é cà; Sora fò ra menestra lassà stà Ch’ a se brostole, anquoi no conta nuja. Ciantà alleluja,

E movè dute quante pize e grei Parchè sta vota onor i voron fei. Hon stentà par l' aré, e ades che l' hon L' è ben rason

Che sone alegre. Betè su el ciapel, Chel fato da Scalon, ma chel pì bel; Ra fanella de pano e chel crosato Bel de scarlato;

Vos femenes un nuvo ciamesoto, De seda el palegren da campanoto, Sul ciau de fillagrana ra busella, Chera pì bella.

I vosc pize pì grei menà par man, Ch' i conosce anche lore el nosc Piovan, Insegnai d' Agostino a dì su el gnon, Quanto l' è bon

Digei, e lore se anche je famea El so Piovan mai pì i no desmentea. Digei ch' i vore ben; ch' i see boi Che jè so fioi

E ch' el l' è come un pare, e vedarè Ciè pize ubbidientes ch' avaré... Zon donca dute incontra e fason vede Ch' i no ra cede

Chi d' Ampezzo a negun canch' i se bette, Ch' i fesc polito e che de cuor jè sciette.... Ma non' hon fosc rason d' esse contente? .... Cie digeo zente?....

Un Piovan come chesto agnò in ciatao, così umil, così bon e tànto brao? No s' el po véde senza i voré ben Propio da sen...

Sentì da un ciau all' autro del paes Che dute tira cride e fesc un ves. Tanta allegria no l' è pì stà in Ampezzo Che l' è un gran pezzo.

I foreste da Fiammes d' Agabona Ièn a grun, da Federa e da Valbona, Come ra fedes inze dedui es và Co s' i da sà.

A sonà campanoto no sentì In ogni luò, ch' i no fenisce pì; Sentì i mortere ch' i no tage mai; Ve preo lasciai

Fei lore chel ch' i par e chel ch' i vò, Lasciaira a Lencio che l' è mestier sò; Lencio te sos ben gran in sta occasion! Bravo! Benon!. ..

Ra musica sentì, sentì i cantore, Ch' i cianta anquoi par pede via anche lore. Par autro un l' ha una rauca busarona, E propio el stona.

Ah zì su par sta montes, poeretto, Un gran sfardor el s' ha ciapà de petto. Dirè vos, ch' el no staghe pì a ciantà Co l' è marà...

Avè mille rasos; ma ciè voreo? Negun l' è in caso del fei sta de meo… Ma lascioi stà ch' i vade dal Dottor Ci ch' ha sfardor....

Vedè quanta carretes coi cavai, Trasparentes e foghe artifiziai, Verse a mezena, a grun, latìs, taliane E ampezzane.

Ma vedè quanta zente d' ogni banda... e Dea ... cie ben ch' el fesc sonà ra banda! Brave Ampezzane vos fagè polito L hon senpre dito.

"Parautro! es disc sta femenes, paresse! Ciè gran Dio bel! De meo no po mia esse. No in coscienza no l' è pì sta una festa. Mai come chesta."

"El Piovan l' eo vedù? Ciè ve par? Gnero Che duto chel ch' i disc le propio vero! El fesc a voja, e alolo che s’ el vede Besen ben crede."

E vos no vi n' avede a mal, Piovan, De sti quattro versate in Ampezzan, Parchè el nosc orto no po dà de pì, E compatì

S’ hon fato poco. D' un paes intiero Accettà el cuor che l' è scietto e sinciero... Eviva el nosc Piovan, crajà Ampezzane Viva cent' ane.

Ra zoventù da Cortina.