X

--Ha! mis enfant, sus l'aigo grouadisso, Apoundié pièi lou patroun dóu Caburle, Nàutri, que sian? Lou vesès, sian la jogo Dóu neblarés, di ro qu'avèn dessouto, E di charneve ounte anan faire sueio... Eh! quau pòu saupre li malemparado? Quau vòu aprene à prega, que navegue! E n'es un bèu, d'eisèmple, aquel estùrti Qu'en milo-vue-cènt-trento, à la desciso, Tirè 'n cop de fusiéu, lou miserable, Au grand sant Crist que i'a dins l'óuratòri Dóu castelas d'Ampuis, contro la dougo... O, i'esclapè lou bras. Mai sa pinello, D'aquéu marrit coula, dins quàuqui mudo, Au Pont Sant-Esperit faguè d'esclapo... Em' éu que fugue' n trau dins l'aigo glouto!-- Lou Caburle enterin, la prègo dicho, Venié d'intra couchons à l'archipèlo De la Grand Cabro, entre-coupa de vorge.