Die besten die man vinden kvnde

Die besten die man vinden kvnde von dem pfade vnz vf den rin die sv̊chte ich nv manige stvnde vnd vant si in dem herzen min die ich han erwelt vs allen wiben dú ist hie bi der wil ich beliben ich wil min sv̊chen lazen sin ich ensols niht langer triben

Swie die vogel an dem rise singen nider alder hoh so bin ich in einer wise vnd enwirde doh niemer vro von der schönen die ich da minne dú mag mir frovn herze vnd sinne ir genade sint also dc ich ir niht wan frumen gewinne

Swie si in der masse schöne were vnd alse gar niht minneklich sone het ich so manige swere von ir niht des dvhte mich wolte si han mit mir gemeine miner sorgen niht wan eine lihte si bedehte sich das min truren wurde kleine