In den svmerlichen tagen hohe stat

IN den svmerlichen tagen hohe stat manig herze niht dc min dc klage ich der schönen dú mir selten lat keine fröide komen darin sol das iemer also sin so mag ich wol klagen dc an ir niht zergat ir vil minneklicher schin

SI gelichet wol dem sternen tremvndan der nie hin noch her gegie als hat si lange wider mich getan dc si ir mv̊t verkeret nie sit ich mich an si verlie so enkvnde ich an ir vinden noh entstan wan versagen das vant ich ie

Si sol wissen swas ich leides von ir klage dc ich doch nie wib gesach die ich so minnekliche in mime herzen trage nie niht anders ich veriach dvlde ich da von vngemach wc dar vmbe ich möhte noh geleben die tage dc nie lieber mir geschach