Nv stet so wol geblümet

Nv stet so wol geblümet dú heide in sumerlicher wat des man vil von wunnen sicht des wirt si wol gerümet von dem swer sich wol wunne entstat doch ist si volgestet nit e das da mer geschicht dc man ǒch frowen sicht da gan losliche so ist si dan gastunge riche das man ir volles lobes gicht

Swa manig wiblich bilde ze semne get· vil wol bekleit da ist der welte wunne vil wie wirt da dan so wilde des mannes herzen in süssekeit der darnach gedenken wil wan sins herzen spil kumt danne vf das zil der süssen minne des bin ich worden inne es ist so gůt das ichs nit hil

Doch git es im ǒch kumber swer verrer dan gedenket da dan im iemer werden mag des bin ǒch ich vil tumber wan es gischicht mir dan iesa das ist minner fröiden slag des mir nacht vnd tag leit vúr fröide ie wag doch sunderliche bin ich gedanken riche nach ir der ich mit dienste ie pflag