Si ist so lieblich wol gestellet

Si ist so lieblich wol gestellet vnd ǒch so schone da bi minnenklich des si mir so wol geuellet ir zucht ich kröne si ist ǒch sinnen rich ir stet ir gan ir grüssen wol si ist houeliche vnd tugenden vol ir stet zartlche so si lachet ir wunne machet dc ich kumber dol

Owe das ich han beuunden das si mir armen nicht ir hulde gan si lat mit senlichen wunden si möche erbarmen das ichs von ir han vnd ich durch trúwe dulde das so müsse mir niemer werden bas liesse si mich in iamer iemer in möchte ir niemer werde doch gehas

Das si so lieblich gebaret gegen· alr der welte wan engegen mir ich weis wol das si des vâret wes ich engelte das ist kunt wol ir mich dunket ǒch war vmb es si das ich ir wer so gerne bi des lat si mich ane ir hulde vnd doch der schulde wirde ich niemer fri

Alle die wile si mich midet so kan ich niemer werden rechte fro des min herze iamer lidet vil leider· iemer vnz es stet also doch tröstet mich ein lieber wan das es ezwenne möcht anders gan dc ich si noch möchte irbarmen das si mich armen nit enwolte lan

Swas der man so gerne het des wúnschst er wunder also wúnsche ǒch ich got lâsse alle ir ere stête vnd doch darvnder das si tröste mich e der tot werde von ir schin sin tröste mich· so můs das sin der beider neme si das eine so sol dú reine doch nicht lassen min