Svmer hat gesendet vs sin wunne

Svmer hat gesendet vs sin wunne secht die blůmen gent vf dur das gras luter clar stet nu der lichte sunne der den winter e· vil trübe was schön ǒgenweide bringt vns der meie er spreit vf dú lant sin wat were ich nicht in senelichem leide vf der heide wurde mir sorgen rat

Der ich alle mine tage diente dú gesprach noch nie zemir hadank das tůt mir als der min herze pfriente owe si machet ser min leben krank ich möchz irbarmen ich bin so verre komen in vil sende not des můs ich in iamer dike erwarmen vnd ǒch armen bis vf minen tot

ICh versůchte von not an minem herzen ob es mechte sich von ir gekern da tet es mir kunt so si senden smerzen das es niemer mechte sich ir erwern ich bin gebunden in ir ginade· wil si so wirde ich irlost wil aber si mir seren herzen wunden zallen stunden owe wa ist ir trost