Owe voglin döne

Owe voglin döne owe manger schöne die vil schone wib dike ê giengen schowen vf heide vnd in owen manig zarter lib in lichtem kleide loslich dur dc gras ir schöne vnd der heide lúchtent· zemene bas beide was da wunnen was

Des wart da von inne fröit vnd wilder sinne manig iunger man die mit mangem blike möchtent sehen dike frowe vf den plan ia was das húre des mag nu nit sin winter bringet sin stúre des sint fröide túre vns vnd vogelsin

JA klage ich noch mere dc min frowe here nie gewag min not vnd ich doch so harte ir genaden warte bis vf minen tot vnd neme dú schone mir noch sende arbeit so wurde mit ir lone edeles heiles krone vf min hǒbt bereit