Wunne wil vnwunne schöne verdringen

Wunne wil vnwunne schöne verdringen des mans hört vnd sicht wol swers nimt war secht ob das· mug manig herze fröiden wern est wunnenklich zehörn· der voglin singen so ist wunnenklich zesehen mang schön var vns wil sumer fröide vnd wunne bern des sint alle fro wan die tulden senden pin dien stêtz so dams in nicht mag gemůten· ich glǒb in bi mir· wan mich lat sin ǒch in sender not das frowe min

Vnrechte minner irrent recht minnere einer machet das vieren missetrúwet wirt der nicht heln kan ald aber heln nicht wil des das sînr frowen eren dan wirt swere vnd aber es im ere danne birt des erwindet lieber minne vil doch solte es nit engelten ein getrúwer man der gerne sicht das sin minnen si tǒgen vnd er das vil wol geuügen kan an den mag sich wol ein gůt wib lan

Dv́ leide hůte irret recht minner sere vnd ǒch der verwâssen merker spehen si frömdent ir frowen in mangú zit dien ǒch dan ir frowen sint zehere die mugen ǒch dc vúr ein irren iehen dist alles wider der minner heile ein strit swie vil keinen das irret so irz mich noch me ich han kleinen glúkes ze minr schonen frowen· si schúhet mich sams si gegen mir giue mir wart ir nie nicht wan ach vnd we