Winter hat vorbotten vsgisendet

Winter hat vorbotten vsgisendet die hant vogel süssen sang erwendet so velwent si dem sumer sin schone var der botten heisset einer súrú bise dú lêrt mangen húre citerwise darnach wirt man snewes vnd rifen schier gewar so heisset einer twer der trübt die tage clar winter bringet her vns sorge vnd anderswar wunnen bar werdent dú lant so gar

So sach man ǒch dike an schonen frowen wunnen mer danne man nu muge geschowen si bergent nu keln blank vnd nekelin vnd ir hǒbit· wîsse hende ǒch dike winter wendet vns süsser ǒgenblike man sach dur klein ermel blanker arme schin so sach man in wiblich sten ir kleinen lin nv went sú sich zihen in die stuben hin lichter schin wil leider túre sin

Doch můs ich vor allen nöten klagen dc mich lat min frowe iamer tragen si tůt glich wies min nit muge minne han swc ich darna trostes an si můte gan si mir nit heils dú reine gůte so ist gar verlorn dc ich mich an si lan nu enmag ichs nit wan si ist so wol gitan doch ensol si licht den můt nit iemer han vf den wan dinge ich noch sender man