Wan mag rölich schowen

Wan mag rölich schowen tage clar· vnd mange var anger vnde walt bistalt· sint wunnenklich berg vnd tal vnd ǒwen sint bekleit vnd heide breit vnd den plan sicht man ǒch wunnenrich nieman kan des sumers wunne volzellen schön sint sin gisellen viol rosen blůmen kle bǒme blůt lǒb gras vnd gamandre

Des habent verlâssen herzen pin dú vogillin sumer tůt ir můt so rechte fro dar zů vf dien strâssen fröiden vil sich haben wil sumer nie verlie· er enfröite so man hört dike an tenzen hohe singen vnd dur bǒme erklingen süsseklich der vogelschal des tůt ir teil wol dú nachtegal

Owe sendú swere machet doch dc ich bin noch iamers vol swie wol· nu mangem ist min frowe seldenbere achtet nicht swie mir geschicht dauon mir von ir noch trostes brist owe si erkent nicht min senden smerzen dauon ir zeherzen nicht engat min arebeit owe das ir güte das vertreit