Swer wol kunne

Swer wol kunne frowen wunne manigualt enzstan der sol sehen gern vnd spehen an ir loslich gan vnd nigen ir zarten grůsse· vnd nemen war das man schowen mag an frowen lieblich wunne gar

Doch swen minne bringet inne wie si twingen mag dem tůnt dike süsse blike kunt vil senden slag swenne er sicht so schone frowen· so wiblich gůt frowen bilde machet wilde dike mannes můt

Swa min ǒgen sehent tǒgen min lieb wolgitan sender smerze kan min herze danne wol durch gan so súftet es ie dar vnder· vnd klagt mir das dú reine wigt so kleine swie mir ist nach ir

Swer sich kunden manger stunden mag der frowen sin in dien dingen mag gelingen im wol werden schin swer frömde da danne můs wesen· dar sin můt treit secht des werben můs verderben gar in arebeit

Selken kumber trage ich tumber nv vil mange zit dest min můten gegen der gůten ǒch so wüste lit so frömdet sich mir dú here· noch leider ie in mocht klagin noch gesagen ir min iamer me