Wa vunde man sament so manig liet

Wa vunde man sament so manig liet man vunde ir niet in dem kúnigriche als in zúrich an bůchen stat des prüuet man dike da meister sang der Manesse rank darnach endeliche des er dú liederbůch nu hat gegen sim houe mechten nigin die singere sin lob hie prüuen vnd andirswa wan sang hat bǒn· vnd wúrzen da vnd wisse er wa gůt sang noch were er wurbe vil endelich darna

Sin sun der kuster der treibs ǒch dar des si gar vil edils sanges die herren gůt hant zemne bracht ir ere prüuet man dabi wer wîste si des aneuanges der hat ir eren wol gidacht das tet ir sin der richter si nach eren das ist ǒch in erborn wol an sang da man die frowen wolgetan wol mitte kan ir lob gemeren den wollten si nit lan zergan

Swem ist mit edlem sange wol des herze ist vol gar edler sinne sang ist ein so gar edles gůt er kumt von edlem sinne dar dur frowen clar dur edil minne von dien zwein kumt so hoher můt was were dú welt· weren wib nicht so schöne dur si wirt so vil süssekeit dur si man wol singet vnde seit so gůt geticht vnd sůs gedöne ir wunne sang vs herzen treit