Dr Holshaer

Rahz – rahz – rahz, De Sohg, die kriescht, Un dorch dan Fichtenschtamm Do gieht än Bewern, Dos nauf bes in dan Wippel zittert Wie wenn har schpiert, Doß jetz har schtaram muß. Es tutt mr manchmol salwer weh, Sun schtaatscher Baam. War wäß es denn, Epp har net ahch Än Harze in sich trehgt Un wos, wos unneräner net verschieht, Un war kennt Gott? Rahz – rahz – rahz, Män Urgrußvoter, Fichtenbaam, Hot dich geflanst, Un ich bin dar, Dar dir des Lahm nu wieder nimmt. Dos is nu mal dis Dumme, Wos mr Schicksal häßt. Iche ho mäns a. Doch loß: An deiner Schteet Un schtolz un schtaatsch wie du, Wärd wieder äne Fichte schtiehn War wäß, vielleicht Flanst se mei Junge än, Dar Ustern aus dr Schule kimmt Un Danneflansen muß, Ehr doß mit Axt un Sohg Har es Hantieren larnt. Die neie Fichte, die wächst huch, Un nohch achtzig Uder hunnert Jahr, Rahz – rahz – rahz, Wärd wieder äner kumme, Der ihr Zum Tutengraber wärd. War wäß, Vielleicht is es dar Enkel Vun män Klänn . . . . Su bindst du Wald, Dei grienes Band Vun Voter, Suhn zu Suhnessuhn, Reckst äne Hand zerick, Dohin, wu unnre Tuten ruhn, Un äne uns voraus, Die of die Ungeburnen wäst. Du labst, Un epp du hunnertmol – Rahz, – Knäääk, – Woff! Un epp du hunnertmol Wärscht imgeschlahn: Du labst. Mir ober warn vergassen. Gott schitz Dan ewerharzschen Wald!