Carmen XII

Antiqua Fusci, claraque Aristii Puer propago, forsitan et meum Ductum unde nomen et meorum, Nunc Ariostum, at Aristium olim;

Te vix triennî iam comitem vocat Suum imperator; grandia iam tibi Virtutis elargitur ultro Præmia, tergeminos honores, Virtute prius quam (nam tenera impedit Ætas) tuo se iungere pectori Possit: sed Augustus futuram Mox videt adveniente pube. Hoc spondet illi nota parentium Virtus tuorum, patrui et optima Thomæ institutio, et quod ista Omnibus indole polliceris. At quantum honoris, tantum oneris datur: Quippe elaborandun est tibi maximam Tui omnium expectationem et Cæsaris iudicium tueri.