Lai d’Equitan

Mut unt esté noble Barun Cil de Bretaine li Bretun ; Jadis suleient par pruesce, Par curteisie, è par noblesce, Des aventures qu’ils oieent, Ki à plusur gent aveneient Fère les Lais pur remenbrance Qu’en ne les meist en ubliance. N’ent firent ceo oï cunter Ki n’est fet mie à ublier. D’Equitan qui mut fu curteis Sire des Nauns jostis è leis. Équitan fu mut de grant pris E mut amez en sun païs ; Déduit amout è druerie, Pur ceo amot Chevalerie. Cil met lur vie en une cure Que d’amur n’unt sens è mesure. Tels est la mesure de amer Que nul ni deit reisun garder. Équitan ot un Séneschal Bon Chevalier pruz è léal, Tute sa tere li gardoit, E meinteneit è justisoit ; Jà, se pur ostier ne fust, Pur nul busuin ki li créust, Li Reis ne laissast sun chacier, Sun déduire, sun rivéier. Feme espuseot li Séneschals Dunt puis vint el païs grant mals. La Dame est bele durement, E de mut bon affeitement ; Gent cors out è bele faiture, En li former muat Nature. Les oilz out veirs, è bel le vis, Bele buche, neis ben asis ; El Réaume ne out sa per. Li Reis l’oï sovent loer Soventefez l’a salua, De ses aveirs li envéia ; Sanz véue l’a coveita E cum ainz pot à li parla. Pur privéement esbanier, En la cuntrée ala chacier, Là ù li Séneschal maneit. El chastel ù la Dame esteit Herberjat li Réis la nuit. Quant repeirout de sun déduit, Asez poeit à li parler, Sun curage è sun bien mustrer ; Mut la trova curteise è sage, Bele de cors è de visage ; De bel semblant è enveisie. Amurs l’ad mis a sa maisnie ; Une séiete ad vers li traite Qui mut grant plaie li ad faite : El quor li ad lancié è mise, N’i ad mestier, sens ni cointise. Pur la Dame l’ad si surpris, Tut en est murnes è pensis. Or li estut del’ tut entendre ; Ne se purrat nient défendre. La nuit ne dort ne se respose ; Mès séï mêmes blasme è chose. Allas ! fet-il, quel destinée M’amenat en ceste cuntrée ? Pur ceste Dame qu’ai véue, M’est un anguisse al quoer ferue, Qui tut le cors me fet trembler, Jeo quit que mei l’estuet amer. E si jo l’aim, jeo ferai mal ; Ceo est la femme al Séneschal. Garder lui deis amur è fei, Si cum jeo voil qu’il face à mei. Si par nul engin le saveit, Bien sai que mut l’en pesereit. Mès nepurquant pis iert asez Que pur li séie afoléz. Si bele Dame tant mar fust, Si ele n’amast, u dru ust ; Que devendreit sa curteisie, Si ele n’amast de druerie ? Suz ciel n’ad femme, s’ele amast, Ki de amur n’en amendast. Li Séneschal, si l’oit cunter Nel’ en deit mie trop peser. Sul ne la peot-il nient tenir ; Certes jeo voil od li partir. Quant ceo ot dit si suspira, Enprès se jut è si pensa. Sui en estrif è en effrei ? Uncore ne sai n’en ai seu S’ele fereit de mei sun dreu ; Mès jeo sauerai hastivement. S’ele sentist ceo ke jeo sent, Jeo perderei ceste dolur, E deuz tant ad de-ci qu’al jur, Jeo ne puis jà repos aveir ; Mut ad ke jeo cuchai eir seir. Li Reis veilla tant que jur fu ; A grant peine ad atendu. Il est levez, si vet chacier ; Mès tost se mist el reperier. E dit que mut est déhaitiez, El chambre vet, si s’est cuchiez. Dolent en est li Sénescaus, Il ne seit pas quels est li maus De quei li Reis sent les friçuns. Sa femme en est dreit acheisuns : Pur sei déduire è cunforter La fist venir à li parler. Sun curage li descovri, Savoir li fet qu’il murt pur li. Del tut li peot faire confort, E bien li peot doner la mort ; Sire, la Dame li ad dit, De ceo m’estuet aveir respit. À ceste primère féiée Ne sei-jeo mie cunseillée ? Vus estes Rei de grant noblesce ; Ne sui mie de teu richesce, Que méi déiez arester Ne druerie ne vostre amer. Si avez fait vostre talent. Jeo sai de veir, ne dut nient ; Tost m’averez entrelaissiée, Jeo sereie mut empeirée, Se si fust que jeo vus aimasse, E vostre requeste otréiasse. Ne sereit pas bele partie Entre nus deus la druerie ; Pur ceo que estes Rei puissaunz, E mi Sire est de vus tenaunz, Que déréiez à mun espeir Le danger del’ amur aveir. Amur n’est pruz se n’est égals ; Meuz vaut un povre hum léals, Si en sei ad sens é valur. Greinur joïe est de s’amur, Qu’il n’est de Prince u de Rei, Quant il n’ad léauté en sei. Si aukun aint plus haltement Que sa richesce n’en apent, Cil se dut de tele rien. Li riches hume requid bien Que nuls ne li toille s’amie Qu’il volt amer pur seignurie. Equitan li respunt après : Dame, merci, nel’ dites mès. Cil ne sunt mie del’ tut curteis ; Ainz est bargaine de burgeis Qui pur aveir ne pur grant fiu, Mettent lur peine en malveis liu. Suz ciel n’ad Dame, s’èle est sage, Curteise è franche de curage, Pur que d’amer se tienge chière Qu’elle ne seit mie novelère. Si ele n’ust suz sun mantel Qu’uns riches Princes de chastel ; Ne se déust pur li pener E léalment è bien amer. Cil ki d’amur sunt novelier E ki s’aturnent de trichier, Il sunt gabé et décéu, E de plusurs l’avum nus veu. N’est pas merveille se cil pert Ki par son crime le désert. Ma chiere Dame à vus mustrei ; Ne me tenez dunc pas pur Rei, Mès pur vostre hum è vostre ami. Séurement vus jure è di Que jeo ferai vostre pleisir, Ne me laissez pur vus murir. Vus seiez Dame, è jeo servant, Vus orguilluse, è jeo préiant. Tant ad li Reis parlé od li E tant li ad crié merci, Que de s’amur l’aséura, E èle sun cors li otria. Par lur anels s’entresaisirent, Lur fiaunce s’entreplévirent ; Bien les tiendrent mut s’entraimèrent, Puis il mururent è finèrent. Lung-tens durrat, lur druerie, Qui ne fu pas de gent oïe ; As fines de lur assembler, Quant ensemble durent parler, Li Reis feseit dire à sa gent Que seignez iert privéement ; Le us des chambres furent clos, Ne troveissez hume si os, Si li Rei pur li n’envéiast, Jà une feiz dedenz entrast. Li Séneschal la curt teneit Les plaiz, è les clamurs oïeit ; Li Reis l’ama mut lungement Qui d’autre femme n’ot talent. Il ne voleit nule espuser ; Jà ne rovast oïr parler. La gent le tindrent mut à mal ; Tant que la femme al Séneschal L’oï suvent, mut li pesa, E de lui perdre se duta. Quant èle pout à li parler E èle li duit joïe mener, Baisier, estreindre è acoler, E ensemble od li juer, Forment plurt è grant déol fist. Li Reis demanda è enquist Que deueit è que céo fu. La Dame li ad respundu : Sire, jo plur pur nostre amur, Qui mei revert à grant dolur. Femme prendrez, fille à un Rei, E si vus partirez de mei : Sovent l’oi dire è bien le sai ; E jeo lasse que devendrai ! Pur vus m’estuet auques la mort Car jeo ne sai autre cunfort. Li Reis li dit, par grant amur, Bele amie, n’éiez pour Certes jà femme ne prendrai Ne pur autre ne vus lairai. Sacez de ver è si créez, Si vostre Sire fust finez, Reine è Dame vus fereie Jà pur femme ne vus lerreie. La Dame l’en ad mercié, E dit que mut li sot bon gré ; E si de ceo l’aséurast, Que pur autre ne la lessast, Hastivement purchacereit, A sun Seignur que mort sereit. Legier sereit à purchacier Pur ceo k’il li vousist aidier Il li respunt que si ferat ; Jà cele rien ne li dirrat, Que il ne face à sun poeir, Fust à folie u à saveir. Sire, fet-èle, si vus plest, Venez chacer en la forest, En la cuntrée ù jeo sujur : Dedenz le chastel mun Seignur Sujurnez ; si serez seignez, E al terz jur si vus baignez. Mi Sires od vus se seignera E od vus puis se baignera ; Dites li bien nel’ lessez mie Que il vus tienge cumpainie. E jeo ferai les bains tremper E les deux cuves aporter ; Sun bain si chaut è si buillant, Suz ciel ne ad humme vivant, Ne fust escaudez è mal mis Einz que dedenz si fust asis. Quant mort serat è escaudez, Nos humes è les soens mandez, Si lur mustrez cum faitement Est mort al bain sudeinement. Li Réis li ad tut graunté, Qu’il en ferat sa volenté. Ne demurat mie treis meis Qu’el païs vet chacier li Reis ; Seiner se fet cuntre sun mal Ensemble od li sun Séneschal. Al terz jur dist k’il baignereit : Li Séneschal dit : jo l’otrei. La Dame fet les bains tremper E les deus cuves aporter. Devant le lit, tut à devise, Ad chescune des cuves mise ; L’ewe buillant fait aporter, U li Sénescal deust entrer. Li Preudum esteit sus levez ; Put déduire fu fors alez. La Dame vient parler al Rei, E il la mist dejuste sei : Sur le lit al Seignur cuchèrent, E déduistrent, è enveisèrent ; Ileoc unt ensemble géu ; Pur la cuve qui devant feu. L’us firent tenir è garder, Une Meschine i deust ester. Li Séneschal hastif revint A l’hus buta, cèle le tint, Icil le fiert par tel haïr, Par force li estut ovrir. Le Rei è sa femme ad trovez U il gisent entreacolez. Li Reis garda, sil’ vit venir, Pensa sa vileinie couvrir, Dedenz la cuve saut joinz pez, É il fu nuz è despuillez. Unques garde ne s’en dona, E ileoc murut escauda. Sur li est le mal revertiz ; E il est sauf è bien gariz. Le Sénescal ad bien véu Coment del’ Rei est avenu ; Sa femme prent demeintenant El bain la met le chief avant. Issi mururent ambedui, Li Reis avant, è èle od lui ; Ki bien vodreit reisun entendre, Ici purreit ensample prendre : Tel purçace le mal d’autrui, Dunt le mals revertit sur lui ; Issi avient, cum dit vus ai, Li Bretun en firent un Lai, De Equitan cum il fina, E la Dame qui tant l’ama. Jà pur humme nel’ lerreie. Suz ciel n’ad hume si ele amast.