Lai du Laustic

Une aventure vus dirai Dunt li Bretun firent un Lai ; Laustic ad nun ceo m’est avis, Si l’apelent en lur païs : Céo est reisun en Franceis, E Nihtegale en dreit Engleis. An Seint Mallo en la cuntrée Est une ville renumée ; Deus Chevaliers illec maneient, E deus forez maisunz aveient. Pur la bunté des deus Baruns Fu de la vile bons li nuns. Li uns aveit femme espusée, Sage, curteise, mut acemée ; A merveille se teneit chière, Sulunc l’usage è la manière. Li autres fu un Bachelers Bien ert conu entre ses pers, De pruesce, de grant valur, E volentiers feseit honur, Munt tenéot è despendeit, E bien donot ceo qu’il aveit. La Femme sun Veisin ama ; Tant la requist, tant la préia, E tant parot en lui grant bien, Q’Ele l’ama sur tute rien, Tant pur le bien qu’ele oï, Tant pur ceo qu’il iert près de li. Sagement è bien s’entreamèrent, Mut se covrirent è esgardèrent Qu’il ne fussent aparcéuz, Ne desturbez, ne mescréus : E ensi le poient bien fère, Kar près esteient lur repère ; Preceines furent lur maisuns, E lur sales, è lur dunguns. N’i aveit bare ne devise, Fors un haut mur de piere bise ; Des chambres ù la Dame jut, Quant à la fenestre s’estut, Poiet parler à sun Ami, Del’ autre part, è il a li ; E lurs aveirs entre-changier, E par geter, è par lancier. N’unt guères rien qui lur despleise Mut estéïent amdui à eise, Fors tant k’il ne poient venir Del’ tut ensemble à lur pleisir. Kar la Dame ert estreit gardée, Quant Cil esteit en la cuntrée ; Mès de tant avéïent recur, U fut par nuit, u fut par jur, Que ensemble poeient parler ; Nul ne poët de ceo garder, Qu’à la fenestre ne venissent. E iloëc s’entrevéissent. Lungement se sunt entre-amé, Tant que ceo vint à un esté, Que bois è prés sunt reverdi, E li vergier ièrent fluri. Cil oiselez par grant duçur, Mainent lur joie ensum la flur ; Ki amer ad à sun talent, N’est merveille s’il i entent. Del Chevaliers vus dirai veir, Il i entent à sun poeir ; E la Dame del’ autre part, E de parler, è de regart : Les nuits quant la lune luseit, E ses Sires cuché esteit, De juste li sovent levot, E de sun mantel s’afublot ; A la fenestre ester veneit, Pur sun ami qu’el’ i saveit. Qui autre teu vie demenot, E le plus de la nuit veillot. Délit avéient à véer Quant plus ne poeient aver. Tant i estut, tant i leva. Que ses Sires s’en curuça, E meintefeiz li demanda, Pur quoi levot è ù ala ? Sire, la Dame li respunt, Il n’en ad joïe en cest mund, Ki n’en ot le Laustic chanter ; Pur ceo me vois ici ester, Tant ducement le oi la nuit, Que mut me semble grant déduit. Tant me délit, è tant le voil, Que jeo ne puis dormir del’ oil. Quant li Sires ot que ele dist, De ire è mal-talent en rist. De une chose purpensa, Que le Laustic enginnera ; Il n’ot Vallet en sa meisun, Ne face engin, reis ù lasçuns, Puis le mettent par le vergier. Ni ot codre, ne chastainier, U il ne mettent laz u glu, Tant que pris l’unt è retenu. Quant le Laustic éurent pris, Al Seignur fu rendu tut vis. Mut en fu liez quant il le tient, As chambres la Dame s’en vient ; Dame, fet-il, ù estes vus ? Venez avant, parlez à nus : Jeo ai le Laustic englué Pur qui vus avez tant veillé. Désor poez gésir en peis, Il ne vus esveillerat meis. Quant la Dame l’od entendu, Dolente è cureçuse fu ; A sun Seignur l’ad demandé, E il l’ocist par engresté ; Le col li rumpt à ses deus meins, De ceo fist-il ke trop vileins ; Sur la Dame le cors geta, Si que sun chainse ensanglanta, Un poi desur le piz devant, De la chambre s’en ist à-tant. La Dame prent le cors petit, Durement plure è si maudit Tuz ceus qui le Laustic traïrent E les engins è laçuns firent. Kar mut l’unt coleré grant hait Lasse, fet-ele, mal m’esteit ! Ne purrai mès la nuit lever, Aler à la fenestre ester, U jeo suleie mun Ami veir ; Une chose sai-jeo de veir, Il quidra ke jéo me feigne De ceo m’estuet que cunseil preigne : Le Laustic li trameterai ; L’aventure li manderai. En une pièce de samit A or brusdé è tut escrit Ad l’Oiselet envolupé ; Un sien Vallet ad apelé, Sun message li ad chargié, A sun Ami l’ad enveié. Cil est al Chevalier venuz De par sa Dame li dist saluz ; Tut sun message li cunta, E le Laustic li présenta. Quant tut li ad dit è mustré, E il l’aveit bien escuté, Del’ aventure esteit dolenz Mès ne fu pas vileinz, ne lenz ; Un vasselet ad fet forgier, Uncques ni ot fer ni acier ; Tut fu d’or fin od bones pières, Mut précieuses, è mut chières, Covercle i ot très bien asis, E le Laustic ad dedenz mis : Puis fist la châsse ensééler, Tuz-jurs l’ad fet od li porter. Cele aventure fu cuntée, Ne pot estre lungues celée ; Un Lai en firent li Bretun E le Laustic l’apellent hum. Pas ne vodreit doner. Ne me porteriez pur rien.