Lai des deux amants

Jadis avint en Normendie Une aventure mut oïe De Deus Amanz qui s’entr’amèrent Par amur ambedeus finèrent ; Un Lai en firent li Bretun Des Deus Amanz reçuit le nun. Vérités est ke en Neustrie Que nus apelum Normendie Ad un haut munt merveilles grant, Là-sus gisent li Dui Enfant. Près de cel munt à une part Par grant cunseil è par esgart, Une Cité fist faire un Reis Qui estoit Sire des Pistreis ; Des Pistréins la fist numer, E Pistre la fist apeler. Tuz-jurs ad puis duré li nuns Uncore i ad vile è meisuns : Nus savum bien de la Cuntrée. Li Vals de Pistre est nomée. Li Reis ot une fille bele Mut curteise Daméïsele ; Cunfortez fu par la Meschine Puisque perdue ot la Réïne : Plusurs à mal li aturnèrent Li suen méisme le blasmèrent. Quant il oï qu’hum en parla Mut fu dolent, mut li pesa ; Cumenca sei à purpenser Cument s’en purrat délivrer, Que nul sa fille ne quesist E luinz, è près, manda è dist : Ki sa fille vodreit aveir, Une chose séust de veir, Sortiz esteit è destiné. De sur le munt fors la cité Entre ses bras la portereit Si que ne se reposereit. Quant la novele fu couneue È par tute la cuntrée seue, Assez plusurs si i allèrent Qui nule rien n’i espleitèrent ; E tuz ceus qui tant s’esforçoent Qui enmi le munt la portoent, Ne poeient plus avant aler, Il lur esteut laissier ester. Lungtens remist cele à doner Que nul ne la volt demander. Al païs ot un Damisel Fiz à un Cunte, gent è bel ; De ben faire, pur aveir pris, Sur tuz autres s’est entremis. En la Curt le Reis conversot, Assez sovent i sujurnot ; La fille al Réi ama E maintefeiz l’areisuna Qu’ele s’amur li otréiast E par france druerie l’amast, Pur ceo k’il est pruz è curteis E pur ceo le prisot li Reis ; Ensemble parlèrent sovent E s’entramèrent léaument, E célereient à lur poeir Que hum nes’ puist aperceveir. La suffrance mut lur greva Mès li Vallez se purpensa Que meuz en volt les maus suffrir, Que trop haster è dunc faillir ; Mut fu par li amur destreiz, Puis avient si qu’à une feiz Qu’à s’Amie vient li Damiseas Qui tant est sages, pruz è beas, Sa pleinte li mustra è dist : Anguissusement li requist Que s’en alast ensemble od lui, Ne poeit mès suffrir l’enui ; Si à son Père la demandot Il saveit bien que tant l’amot Que pas ne li vodreit doner, Si il ne la puist aporter Entre ses braz ensum le munt. La Damisele li respunt : Amis, fait-ele, jeo sai bien Si ne me porteriez pur rien ; N’estes mie si vertuus, Si jo m’en vois ensemble od vus, Mi Pères auereit è doel è ire Ne vivereit mie sanz martire. Certes tant l’aim è si fais chier Jeo nel’ vodréie curucier ; Autre cunseil vus estuet prendre, Kar cest ne voil-jeo pas entendre. En Salerne ai une Parente Riche femme, mut a grant rente ; Plus de trente ans i ad esté L’art de phisike ad tant usé, Que mut est saines de mescines, Tant cunust herbes è racines ; Si vus à li volez aler E mes lettres od vus porter, E mustrer li vostre aventure, Ele en prendra cunseil è cure. Uns lettuaires vous dunrat E teus beivres vus baillerat, Que tut vus recunforterunt E bone vertu vus dunrunt. Quant en cest païs revendrez A mun Père me requèrez : Il vus en tendrat pur enfant, Si vus dirat le cunvenant, Que à nul hum ne me dunrat Jà cele peine ni mettrat, Si al munt ne me peust porter Entre ses bras sanz reposer. Li Vallez oï la novele E le cunseil à la Pucele, Mut en fu lié, si la mercie, Cungié demande à s’Amie. En sa cuntrée en est alez, Hastivement s’est atornez De riches dras è de divers Ce palefreiz è de sumers, De ses humes les plus privez, A li Danzeas od sei menez. A Salerne vait séjurner A l’Aunte s’Amie vet parler De sa part li dunat un brief : Quant el l’ot lu de chief en chief Ensemble od li l’a retenu Tant que sun estre ad tant séu. Par mescines l’ad esforcié, Un tel beivre li ad chargié, Jà ne sera tant travailliez. Ne si ateint, ne si chargiez, Ne li resfrechit tut le cors, Néis les vaines, ne les os, E qu’il n’en ait tele vertu Si-tost cum il en aura bu, Puis le remeine en sun païs ; Le beivre ad en un vessel mis Li Damiseas joios è liez. Quant arière fu repeiriez Ne séjurnat pas en la terre, Al Rei ala sa fille quere, Qu’il li donast, il la prendreit, En-sum le munt la portereit. Li Réis nel’ escundist mie, Mès mut le tint à grant folie, Pur ceo qu’il iert de jéosne âge ; Tant produm, è vaillant è sage Unt asaié icele afaire Ki n’en purent à nul chief traire. Terme li a numé et pris, Ses hume mande è ses amis E tuz ceus k’il poeit aveir, Ne ni laissa nul remaneir, Pur sa Fille, pur le Vallet Ki en aventure se met, De li porter en-sum le munt, De tutes parz venus i sunt. La Dameisele s’aturna Mut se destreint, è mut juna, E à manger pur aléger Qu’od sun ami voleit aler. Al jur quant tuz furent venu Le Dameisel premier i fu, Sun beivre ni ublia mie Devers Seigne en la praerie Fu la grant gent tut assemblée, Li Reis ad sa Fille menée. N’ot drap vestu fors la chemise ; Entre ses bras l’aveit cil prise, La fiolette od tut sun beivre, Bien seit qu’ele nel’ vout déceivre ; En sa main porter li baille. Mès jeo creim que poi li vaille, Kar n’ot en lui point de mesure, Od lui s’en veit grant aléure. Le munt munta desi qu’en-mi ; Pur la joïe qu’il od de li De sun beivre ne li membra : Ele senti qu’il abaissa Amis, fet-ele, kar bevez Jeo sai bien que vous vous lassez Si recuvrez votre vertu. Le Damisel a respondu : Bele, jeo sens tut fort mun quer Ne m’arestereie à nul fuer Si lungement que jeo béusse Pur quei treis pas aller péusse ; Ceste gent nus escriereient De lur noise m’esturdireient, Tost me porreïent desturber Jo nel’ voil pas ci arester. Quant les deus parz fu munté suz Pur un petit qu’il ne chiet jus ; Sovent li prie la Meschine, Ami, bevez vostre mescine. Jà ne la volt oïr ne creire, A grant anguisse od tut l’eire, Sur le munt vint, tant se greva, Ileoc chaï, puis ne leva ; Li quors del’ ventre s’en parti. La Pucele vit sun ami, Quida qu’il fust en paumeisuns Lez lui se met en genuilluns ; Sun beivre li voleit doner Mès il ne pot od lui parler. Issi murut cum jeo vus di, Ele le pleint à mut haut cri ; Puis a jeté è espendu Le veissel ù le beivre fu : Li muns en fu bien avusez, Mut en a esté amendez. Tut le païs è la cuntrée, Meinte bone herbe i unt trovée, Ki del’ beivre orent racine. Or vus dirai de la Mescine, Puisque sun Ami ot perdu, Unkes si dolente ne fu, Lez lui se cuche è estent, Entre ses braz l’estreint è prent, Sovent li baise oïl è buche, Li dols de li al quor la tuche ; Ilec murut la Dameisele, Qui tant est pruz, è sage et bele. Li Reis è cil lur atendeient Quant unt vu que il ne veneient Vunt après eus sis unt trovez, Li Reis chiet à terre paumez. Quant pot parler, grand dol démeine Ki si firent la gent foreine. Treis jurs les unt tenu sur terre Sarcu de marbre firent quere Les Deus Enfans unt mis dedenz. Par le cunseil de cele genz, Sur le munt si les enfuïrent, E puis à-tant se départirent. Pur l’aventure des Enfanz Ad nun li Munz des Deus Amanz ; Issi avint cum dit vus ai Li Bretun en firent un Lai.