Lai du Bisclavaret

Quant de Lais faire m’entremet Ne voil ublier Bisclaveret ; Bisclaveret ad nun en Bretan, Garwall l’apelent li Norman. Jadis le poët-hum oïr, E souvent suleit avenir, Humes plusurs Garwall devindrent E es boscages meisun tindrent. Garwall si est beste salvage ; Tant cum il est en cele rage, Humes dévure, grant mal fait, Es granz forest converse è vait. Cest afère les ore ester Del’ Bisclaveret voil cunter. En Bretaine maneit un Ber Merveille l’ai oï loer ; Beau chevaliers è bon esteit E noblement se cunteneit. De sun Seinur esteit privez E de tuz ses veisinz amez. Femme ot espusé mut vailant E qui mut feseit beau semblant. Il amot li è ele lui ; Mès d’une chose ert grant envi Qu’en la semeine le deperdeit Treis jurs entiers qu’ele ne saveit. U deveneit, ne ù alout ; Ne nul des soenz nient ne sout. Une feiz esteit repeirez A sa meisun joius è liez ; Demandé li ad è enquiz, Sire, fait-el, beau duz amiz, Une chose vus demandasse Mut volentiers si jeo osasse : Mès jeo creim tant vostre curuz Que nule rien tant ne redut. Quant il l’oï si l’acola, Vers li la traist, si la beisa, Dame, si fait-il, demandez ; Jà cele chose ne me direz Si jeo la sai, ne la vus die. Par fei, fet-ele, ore sui garie : Sire, jeo sui en tel effrei, Les jurs quant vus partez de mei ; El lever en ai grant dolour E de vus perdre tele pour, Si jeo n’en ai hastit cunfort, Bien-tost en puis avoir la mort. Kar me distes ù vus alez, U vus estes, ù conversez. Mun escient, qui vus amez, E si si est vus meserrez. Dame, fet-il, pur Deu merci, Mal m’en vendra si jol’ vus di : Kar de m’amur vus partirai E me-mesmes en perderai. Quant la Dame l’od entendu, Nel’ ad nient en gas tenu Suvente feiz li demanda, Tant le blandi, è losenga, Que s’aventure li cunta, Nule chose ne li céla. Dame jeo deviens Bisclaveret, En cele grant forest me met, Al plus espès de la gaudine, Si vif de preie è de racine. Quant il li aveit tut cunté, Enquis li ad è demaundé S’il se despuille u vet vestu. Dame, fet-il, jeo vois tut nu. Di mei, par Deu, ù sunt voz dras ? Dame, ceo ne dirai vus pas Kar si jeo les eusse perduz E de ceo feusse aparcéuz, Bisclaveret sereie à tuz-jurs ; Jamès n’avereie mes sucurs, De ci k’il me fussent rendu : Por ceo ne voil k’il seit séu. Sire, la Dame li respunt, Jeo vus eim plus que tut le mund ; Nel’ me devez nient céler, Ne de nule rien duter : Ne semblereit pas amisté. Qu’ai-jeo forfait, por quel péché Me dutez vus de nule rien ? Dites mei et si ferez bien. Tant l’angoussa, tant le surprist, Ne pout-il faire, si le dist : Dame, fet-il, delez cel bois, Lez le chemin, par un troivois, Une vielz chapele i esteit, Ke meintefeiz grant bien me feit ; Là est la pierre cruose è lée, Suz un bussun, dedanz cavée ; Mes draz i met suz le buissun Tant que jeo revine à meisun. La Dame oï cele merveille, De päour fu tute vermeille, De l’aventure s’éffréa, E maint endreit se purpensa Cume ele s’en puist partir ; Ne voleit mès lez-lui gesir. Un Chevalier de la cuntrée Qui lungement l’aveit amée E mut préié è mut requise, E mut durré en sun servise Ele ne l’aveit unkes amé, Ne de s’amur aséuré, Celui manda par sun message Si li descouvri sun curage ; Amis, fet-ele, séez lez, Ceo dunt vus estes traveillez Vus otri-jeo sanz nul respit ; Jà m’averez nul cuntredit ; M’amur è mun cors vus otrei : Vostre drue feites de mei. Cil l’en mercie bonement E la fiance de li firent ; E ele le met par serement ; Puis li cunta cum-faitement, Ses Sires ala, è k’il devint ; Tute la veie ke il tint. Vers la forest l’enséïgna, Pur sa despuille l’envéia. Issi fu Bisclaveret trahiz E par sa femme maubailiz. Pur ceo qu’hum le perdeit sovent, Quidouent tuz comunalment. Quant dunc s’en fust del’ tut alez, Asez fu quis è demandez : Mès nel’ porent mie trover ; S’il lur estuit lesser ester. La Dame ad cil dunc espusée Qui lungement l’aveit amée ; Issi remist un an entier, Tant que li Reis ala chacier : A la forest ala tut dreit, La ù li Bisclaveret esteit. Quant li chiens furent descuplé, Li Bisclaveret unt encuntré ; A lui currurent tute jur, E li chiens è li venéur Tant que par poi nel’ eurent pris, E tut déciré è mau-mis. Desi qu’il ad le Rei choisi ; Vers li curut querre merci. Il l’aveit pris par l’estrié, La jambe li baise è le pié. Li Reis le vit grant poür ad ; Ses cumpainuns tuz apelad. Seignurs, fet-il, avant venez, Ceste merveille esgardez ; Cum ceste beste se humilie : Ele ad sen de hum, merci crie Chacez mei tuz ces chiens arère, Si gardez que hum ne la fière. Ceste beste ad entente è sen, Espleitez vos ; alum nus en. A la beste durrai ma pès Kar ici ne chacerrai huimès. Li Reis s’en est turné à-tant. Le Bisclaveret li vet siwant ; Mut se tint près, n’en vout partir, Il n’ad cure de li guerpir. Li Reis l’enmeine en sun chastel, Mut en fu liez, mut li est bel, Ke unke mès tel n’ot véu. A grant merveille l’ot tenu, E mut le tient à grant chierté, A tuz les siens ad comaundé Que sur s’amur le gardent bien E ne li meffacent de rien, Ne par nul d’eus ne seit feruz, Bien seit abevreiz è péuz. Cil le gardèrent volenters. Tuz-jurs entre les Chevalers, E près del’ Rei s’alout cuchier. Ni ad celui qui nel’ ad chier, Tant esteit franc è déboneire : Unc ne volt à rien meffaire. U ke li Reis déust errer Il n’out cure de desevrer ; Ensemble od li tuz-jurs alout, Bien s’apareit que il l’amout. Oez après cument avint A une Curt ke li Rei tint, Tuz li Baruns aveit mandez, Ceus ki furent de li chacez, Pur aider sa feste à tenir, E lui plus beal faire servir. Richement è bien aturnez, Li Chevaler i est alez Ki la femme Bisclaveret ot. Il ne saveit ne ne quidot Qu’il le déust trover si près. Si tost cum il vint al paleis, E le Bisclaveret l’aparceut, De plain esleis vers li curut. As dens le prist, vers li le trait, Jà li éust mut grant leid fait, Ne fust li Reis ki l’apela D’une verge le manaça. Deus feis le vout mordre al jur. Mut s’esmerveillent li plusur, Kar unkes tel semblant ne fist, Verz nul hume ke il véist. Céo vient tut par la meisun Ke il ne fet mie sans reisun ; Meffait li ad coment que seit Kar volentiers se vengereit. A cele feiz remist issi, Tant ke la feste départi ; E li Baruns unt pris cungé ; A lur meisun sunt repeiré. Alez s’en est li Chevalers, Mien escient tut as premers, Que le Bisclaveret asailli ; N’est merveille s’il le haï. Ne fu puis guères lungement, Ceo m’est avis, si cum j’entent, Qu’à la forest ala li Reis, Qui tant fu sages è curteis, U li Bisclaveret fu trovez ; E il i est od li alez. La nuit, quant il s’en repeira, En la cuntrée héberga ; La femme Bisclaveret le sot ; Avenantment s’appareilot, Al demain vait al Rei parler, Riche présent li fait porter. Quant Bisclaveret la veit venir Nul hum nel’ poeit retenir, Vers li curut cum enragiez, Oiez cum il est bien vengiez. Le neis li esracha del’ vis ; Quei li péust-il faire pis ? De tute parz l’unt manacié Jà le eussent tut dépescié, Quant un sages Hum dist al Rei : Sire, fet-il, entent à mei ; Ceste Beste ad esté od vus, Ni ad ore celui de nus, Qui nel’ eit véu lungement, E près de li alé sovent. Unke mès hume ne tucha, Ne félunie ne mustra, Fors à la Dame qu’ici vei, Par cele fei que jeo vus dei : Aukun curuz ad il vers li E vers sun Seignur autresi. Ceo est la femme al Chevaler Qui taunt par suliez aveir cher, Qui lung-tens ad esté perduz, Ne sumes ù est devenuz. Kar metez la Dame en destreit, S’aucune chose vus direit ; Pur quei ceste Beste la heit, Fètes li dire s’el le seit. Meinte merveille avum véu, Que en Bretaigne est avenu. Li Reis ad sun cunseil créu, Le Chevaler ad retenu, Del’ autre part ad la Dame prise, E en mut grant destresce mise ; Tant par destresce è par poür, Tut li cunta de sun Seignur, Coment ele l’aveit trahi, E sa despoille li toli. L’aventure qu’il li cunta E que devint è ù ala, Puis que ses dras li ot toluz, Ne fud en sun païz véuz, Très bien quidat è bien créeit, Que la beste Bisclaveret seit. Le Reis demande la despoille : U bel li seit u pas nel’ voille ; Arière la fet aporter, Al Bisclaveret la fist doner. Quant les urent devant li mise Ne se prist garde en nule guise ; Li Prudum le Rei apela, Cil ki primes le cunseilla : Sires, ne fètes mie bien Cist nel’ fereit pur nule rien, Que devant vus ses dras reveste, Ne muet semblance de beste. Ne savez mie que ceo munte Mut durement en ad grant hunte : En tes chambres le fai mener, E la despoille od li porter ; Une grant pièce l’i laisrums, S’il devient hum bien le verums. Li Reis méïsmes le mena, E tus les hus sur li ferma ; Al chief de pièce i est alez, Deus Baruns ad od li menez, En la chambre entrent tut trei Sur le demeine lit al Rei Trova dormant le Chevalier. Li Reis le curut enbracier, Plus de cent feiz l’acole è baise, Si tost cum il pot aver aise. Tute sa tere li rendi, Plus li duna ke jeo ne di. La feme ad del’ païs ostée, E chacié hors de la cuntrée. Cil s’en alat ensemble od li Par ki sun Seignur od trahi, Enfanz en ad asez éuz, Puis unt esté bien cunéuz, Del’ semblant è de le visage : Plusurs femmes de cel lignage, C’est vérité, senz nés sunt néies, E si sovienent esnaséies. L’aventure k’avez oïe Veraïe fu, n’en dutez mie ; De Bisclaveret fu feit li Lais, Pur remembrance à tut-dis-mais.