Lai du Chaitivel

Talent me prist de remembrer Un Lai dunt jeo oï parler : L’aventure vus en dirais E la Cité vus numerai, U il fu nez, cum il ot nun, Le Chaitivel l’apelet-hum ; E si ad plusurs de céus Ki l’apelent les Quatre Deuls. En Bretaine à Nantes maneit Une Dame qui mut valeit De beauté è d’enseignement, E de tut bon affeitement ; N’ot en la tère Chevalier, Qi aukes fust à préisier, Pur ceo q’une feiz la véist, Qi nel’ amast è requéist. Ele nes’ pot mie tuz amer, Ne ele nes’ pot mie tuer ; Tutes les Dames d’une tère, Vaudréit meuz d’amur requère Que un fol de sun pan tolir, Kar cil le volt arreire férir. La Dame fait à celui gré De tuz le bone volunté, Pur quant s’ele nes’ veolt oïr, Nes’ deit de paroles leidir, Mès énurer, è tenir chier, A gré servir è mercier. La Dame dunt jo voil cunter Qi tant fu requise de amer, Pur sa beauté, pur sa valur, S’en entremistrent nuit è jur. En Bretaine ot quatre Baruns Mès jeo ne sai numer lur nuns, Mès mut èrent de grant beauté Il n’aveient guères de ée, E Chevalers preux, è vaillanz, Larges, curteis, è despendanz : Mut estéient tuz de grant pris, E gentiz hummes del’ païs, Icil quatre la Dame amoent E de bien fère se penoent, Pur li è pur l’amur aveir, I meteit chescun sun poeir ; Chescun par sei la requereit, E tute sa peine i meteit. Ni ot celui ki ne quidast Qi meuz d’autre ni espleitast ; La Dame fu de grant prisens En respit mist è en purpens, Pur saver, è pur demander, Liquils sereit meuz à amer. Tant furent tuz de grant valur, Ne pot eslire le meillur ; Ne volt les treis perdre pur l’un Bele semblant fait à chescun : Ses drueries tus lur donout, Ses Messages lur enveiout ; Li uns del’ autre ne saveit, Mès départir nul nès poeit, Par bel servir, è par prier, Ke dot chescun meuz espleiser. Al assembler des Chevaliers Voleit chescun estre primers De bien fère, si il péust, Pur ceo que à la Dame pleust : Tuz la teneïent pur amie, Tuz portouent sa druerie, Anel, u mance, u gumfanun, E chescun escriot sun nun. Tuz quatre les ama è tient Tant qu’après une Paske vient, Que devant Nantes la cité Ot un turnéïement crié, Par aquointer les Quatre Druz, I sunt d’autre païs venuz : E li Franceis, è li Norman, E li Flemens, è li Breban, Li Buluinez, li Angevin ; Cil ki près furent véïsin Tuz i sunt volenters alé Lunc-tens aveïent sujurné, Al vespres del’ turnéïment, S’entreférirent durement : Li Quatre Druz furent armé, E eissèrent de la cité. Lur Chevaliers viendrent après Mès sur eus Quatre fu le fez. Cil defors les unt conéuz, As enseignes, è as escuz, Cuntre envéïent Chevaliers Deus Flamens, è deus Henoiers Apareillez cume de puindre, Ni ad celui ne voille juindre, Cil les virent vers eus venir, N’aveïent pas talent de fuir, Lance baissié tut à esplun, Choisi chescun sun compainun. Par tel haïr s’entreférirent E li Quatre defors obéirent ; Il n’eurent cure des destriers Ainz laissèrent les estriers, Sur les abatuz se resturent, Lurs Chevalers les succururent. A la rescusse ot grant meslée Meint coup i ot féru d’espée. La Dame fu sur une tur, Bien choisi les suens è les lur ; Ses Druz i vit mut bien aidier, Ne seit que il deit plus prisier. Li turnéïement cumenca, Li reng crurent, mut espessa Devant la porte meintefeiz, Fu le jur mellé le turneiz. Li Quatre Druz bien feseïent, Si ke de tuz le pris aveïent : Tant ke ceo vient al avesprer, Que il deveïent désevrer. Trop folement s’abaundonèrent, Luinz de lur gens s’il comperèrent Kar li Treis si furent ocis, E li Quart nafrez è malmis ; Parmi la quisse è einz al cors, Si qe la lance parut defors. A traverse furent perduz, E tuz Quatre furent chéuz. Cil ki à mort les unt nafrez, Lur escuz unt ès chans getez, Mut esteïent par eus dolent, Nel’ firent pas à escient. La noise levat è le cri, Uns tel doel mais ne fu oï ; Cil de la cité i alèrent Unkes les autres ne dutèrent. Pur la dolur des Chevaliers, I aveit iteus deus milliers, Ki lur ventaille deslacièrent, Chevoiz, è barbes détraihèrent. Entre eus esteit li doels comuns, Sur sun escu fu mis chescuns ; En la Cité les unt porté, A la Dame kis’ ot amé : Desqu’Ele sot cele Aventure Paumée chiet à tère dure. Quant Ele vient de paumeisun, Chescun regrette par sun nun. Lasse, fet ele, quoi ferai, Jamès haitiée ne serai ; Ces Quatre Chevaliers amoue, E chescun par sei cuveitoue, Mut par aveit eus granz biens, Il m’amouent sur tute riens. Pur lur beauté, pur lur pruesce, Pur lur valur, pur lur largesse, Les fis d’amer pur mei entendre Nes’ voil tuz pesdre pur l’un prendre Ne sai lequil jeo dei plus pleindre. Mès ne puis covrir, ne feindre. L’un vei nafré, li trei sunt mort, N’ai rien el mund ki me confort : Les morz ferai ensevelir, E si li nafrez poeit garir, Volenters m’entremeterai E bons mires li baillerai. En ses chambres le fet porter, Puis fist les autres cunréer. A grant amur è noblement, Les aturnat è richement ; En une mut riche abéie, Fist grant offrende è grant partie La ù il furent enfuï. Deus lur face bone merci. Sages mires aveit mandez Sei ad al Chevalier livrez Ki en sa chambre jut nafrez, Tant qu’à garisun est turnez. Ele l’alot véer sovent, E cunfortout mut bonement. Mès les autres treis regretot, E grant dolur pur eus menot. Un jur d’esté après manger, Parlot la Dame al Chevaler De sun grant doel li remembrot, Sun chief ça jus bien en baissot, Forment comencet à pener E il l’a prist à regarder ; Bien aperceit que ele pensot ; Avénaument l’areisunot. Dame, vus estes en effrei ! Quoi pensez vus, dites le mei : Lessez votre dolur ester, Bien vus devriez conforter. Amis, fet-ele, jeo pensoue E vos cumpainuns remenbroue ; Jamès Dame de mun parage, Tant n’iert bele, pruz, ne sage, Teuz quatre ensemble n’amerai E en un jur si n’es perdrai, Fors vus tut sul ki nafrez fustes, Grant paour de mort en éustes. Pur ceo que tant vus ai amez Voil que mes doels seit remembrez. De vus Quatre ferai un Lai, E Quatre Dols vus numerai. Li Chevalers li respundi Hastivement quant il l’oï ; Dame, fètes le Lai novel, Sil’ apelez le Chaitivel, E jeo voil mustrer la reisun, Que il deit issi aver nun. Li autre sunt piéça finé E tut le sècle unt usé, La grant peine qu’il en suffreient, De l’amur qu’il vers vus aveient : Mès jo ki sui eschapé vif, Tut esgaré è tut cheitif, Ceo qu’al sècle puis plus amer, Vei sovent venir è aler ; Parler od mei matin è seir. Si n’en puis nule joie aveir, Ne de baisier, ne d’acoler, Ne d’autre bien fors de parler. Teus cest maus me fètes suffrir, Meuz me vaudreit la mort tenir, Ceo ert li Lai de mei nomez, Le Chaitivel iert apelez ; Ki Quatre Dols le numera, Sun propre nun li changera, Par fei, fet-ele, ceo m’est bel, Ore l’apelum le Chaitivel. Issi fu li Lais comenciez, E puis parfaiz è anunciez, Icil kil’ portèrent avant, Quatre Dols l’apelent alquant. Chescun des nuns bien i afiert : Kar la matire le requiert : Le Chaitivel ad nun en us, Ici finist, kar ni ad plus, Plus n’en oï, ne plus n’en sai, Ne plus ne vus en cunterai.