« Cette belle ennemie et d’Amour et de moi »

Ceste belle ennemie & d’Amour & de moy, Qui presqu’en se iouant range tout en seruage, Ha pour soldats choisis, & pour riche equipage L’honneur, la Chasteté, la Constance, & la Foy :

Vn seul mauuais penser n’a place aupres de soy, La Vertu toute viue est peinte en son visage : Si bien que qui la voit leue au Ciel son courage, Et des communs desirs n’esprouue point la loy.

Ses yeux sont deux Soleils de beauté si parfaite, Que d’Amour & de Mars la lance & la sagete N’ont point tant de pouuoir contre vne liberté :

La Grace & la Douceur sont tousiours auec elle. Ceste belle Deesse, ah ! non seulement belle, Ains Bellone & guerriere ainsi m’a surmonté.