Tout ce qui est de sainct

Tout ce qui est de sainct, d’honneur et de vertu, Tout le bien qu’aux mortels la Nature peut faire, Tout ce que l’artifice icy peut contrefaire, Ma Maistresse en naissant en l’esprit l’avoit eu.

Du juste et de l’honneste à l’envy debatu Aux escoles des Grecs : de ce qui peut attraire A l’amour du vray bien, à fuir le contraire, Ainsi que d’un habit son corps fut revestu.

Toujours la chasteté des beautez ennemie (Comme l’or fait la Perle) honore son Printemps, Une vertu parfaite, une peur d’infamie,

Un œil qui fait les Dieux et les hommes contens : La voyant si parfaite, il faut que je m’escrie, Bien-heureux qui l’adore et qui vit de son temps !