Tu es vn trop sec

TV es vn trop sec biberon Pour vn tourneur d'Anacreon, Belleau, & quoy ! ceste Comete Qui naguiere au ciel reluisoit, Rien que la soif ne predisoit, Ou ie suis vn mauuais prophete. Les plus chauds Astres etherez Ramenent les iours alterez En ce mois pour nous faire boire: Boy donques : apres le trespas, Ombre tu ne boiras là bas Que ie ne sçay quelle onde noire. Mais non ne boy point mon Belleau, Si tu veux monter au tropeau Des Muses, desur leur montaigne: Il vaut trop mieux estudier Comme tu fais que s'allier De Bacchus & de sa compagne. Quand auecques Bacchus on ioint Venus sans mesure, on n'a point Saine du cerueau la partie: Donc pour corriger son defaut, Vn vieil pedagogue il luy faut, Vn Silence qui le chastie: Ou les pucelles dont il fut Nourry, quand Iupin le receut Tout vif de sa mere bruslée: Ce furent les Nymphes des eaux: » Car Bacchus gaste nos cerueaux, » Si la Nymphe n'y est meslee.