Vous triomphez de moy, et pource je vous donne

Vous triomphez de moy, et pource je vous donne Ce lhierre, qui coule et se glisse à l’entour Des arbres et des murs, lesquels tour dessus tour, Plis dessus plis il serre, embrasse et environne. A vous de ce lhierre appartient la Couronne. Je voudrois, comme il fait, et de nuict et de jour Me plier contre vous, et languissant d’amour, D’un nœud ferme enlasser vostre belle colonne. Ne viendra point le temps, que dessous les rameaux, Au matin où l’Aurore esveille toutes choses, En un ciel bien tranquille, au caquet des oiseaux Je vous puisse baiser à lévres demy-closes, Et vous conter mon mal, et de mes bras jumeaux Embrasser à souhait vostre yvoire et vos roses ?