Ci encoumence li diz de Puille

Cil Damediex qui fist air, feu, et terre et meir, Et qui por nostre mort senti le mors ameir, Il doint saint paradix qui tant fait à ameir A touz ceulz qui orront mon dit sans diffameir !

De Puille est la matyre que je vuel coumancier Et dou Roi de Cézile, que Dieux puisse avancier ! Qui vodrat elz sainz cielz semance semancier Voisse aider au boen roi qui tant fait à prisier.

Li boens Rois estoit cuens d’Anjou et de Provance, Et c’estoit filz de roi, frères au roi de France. Bien pert qu’il ne vuet pas faire Dieu de sa pance Quant por l’arme sauveir met le cors en balance.

Or preneiz à ce garde, li groz et li menu, Que puis que nos sons nei et au siècle venu, S’avons-nos pou à vivre ; s’ai-je bien retenu, Bien avons mains à vivre quant nos sommes chenu.

Conquérons paradix quant le poons conquerre ; N’atendons mie tant meslée soit la serre. L’arme at tantost son droit que li cors est en terre : Quant sentance est donée noians est de plus querre.

Dieux done paradix à touz ces bien voillans : Qui aidier ne li vuet bien doit estre dolanz. Trop at contre le Roi d’Yaumons et d’Agoulans : Il at non li rois Charles : or li faut des Rollans.

Sains Andreuz savoit bien que paradix valoit Quant por crucefier à son martyre aloit. N’atendons mie tant que la mors nos aloit, Car bien serions mort se teiz dons nos failloit.

Cilz siècles n’est pas siècles, ainz est chans de bataille, Et nos nos combatons à vins et à vitaille. Ausi prenons le tens com par ci le me taille ; S’acréons seur noz armes et metons à la taille.

Quant vanra au paier coument paiera l’arme Quant li cors selon Dieu ne moissone ne same ? Se garans ne li est Dieux et la douce Dame, Gezir les convanra en parmenable flame.

Pichéour vont à Roume querre confession Et laissent tout encemble avoir et mansion. Si vont fors pénitance, ci at confusion ; Voisent .i. pou avant, s’auront rémission.

Bien est foulz et mauvais qui teil voie n’emprent Por escheveir le feu qui tout adès emprant. Povre est sa conciance quant de non reprent, Pou prise paradix quant à ce ne se prent.

Gentilz cuens de Poitiers, Diex et sa douce Meire Vous doint saint paradyx et la grant joie cleire ! Bien li aveiz montrei loiaul amour de frère, Ne vos a pas tenu convoitize la neire.

Bien i meteiz le vostre, bien l’i aveiz jà mis ; Bien monstreiz au besoing que vos iestes amis : Se chacuns endroit soi c’en fust si entremis, Ancor oan éust Charles mult moins d’anemis.

Prions por le roi Charle ; c’est por nos maintenir, Por Dieu et sainte Églize c’est mis au convenir. Or prions Jhésu-Crit que il puist avenir A ce qu’il a empris, et son ost maintenir.

Prélat, ne grouciez mie dou dizèime paier, Mais priez Jhésu-Crit qu’il pance d’apaier ; Car se ce n’a mestier, sachiez sanz délaier, Hom panrra à méimes : si porroiz abaier.