Ci encoumence la desputizons dou croisié et dou descroizié

L’autr’ier entour la Saint-Remei Chevauchoie por mon afaire, Pencix, car trop sunt agrumi La gent dont Diex a plus afaire, Cil d’Acre, qui n’ont nul ami, Ce puet-on bien por voir retraire, Et sont si près lor anemi Qu’à eux puéent lancier et traire.

Tant fui pancis à ceste choze Que je desvoiai de ma voie, Com cil qu’à li méimes choze, Por le penceir que g’i avoie. Une maison fort et bien cloze Trouvai, dont je riens ne savoie, Et c’estoit là-dedens encloze Une gent que je demandoie.

Chevaliers i avoit teiz quatre Qui bien seivent parleir fransois. Soupei orent, si vont esbatre En un vergier deleiz le bois. Ge ne me veulz sor eux embatre, Que ce me dist uns hons cortois : Tiez cuide compaignie esbatre Qui la toust cost or sans gabois.

Li dui laissent parleir les deux Et je les pris à escouteir, Qui leiz la haie fui touz seux ; Si descent por moi acouteir. Si distrent, entre gas et geux, Teiz moz com vos m’orreiz conteir. Siècles i fut nomeiz et Deus : De ce pristrent à desputeir.

Li uns d’eux avoit la croix prise, Li autre ne la voloit prendre. Or estoit de ce lor emprise, Que li croisiez voloit aprendre A celui qui pas ne desprise La croix, ne la main n’i vuet tendre, Qu’il la préist par sa maîtrize, Ce ces sans ce puet tant estendre.

Dit li croisiez premièrement : « Enten à moi, biaux dolz amis ; Tu seiz mult bien entièrement Que Diex en toi le san a mis, Dont tu connois apertement Bien de mal, amis d’anemis. Se tu en euvres sagement, Tes loïers t’en est promis.

« Tu voiz, et parsois, et entens Le meschief de la sainte terre. Por qu’est de proesse vantans Qui le leu Dieu lait en teil guerre ? S’uns hom pooit vivre .c. ans Ne puet-il tant d’oneur conquerre Com se il est bien repentans D’aleir le sépulchre requerre. »

Dit li autre : « J’entens mult bien Por quoi vos dites teiz paroles. Vos me sermoneiz que le mien Doingne au coc et puis si m’envole. Mes enfans garderont li chien Qui demorront en la parole. Hon dit : Ce que tu tiens, si tien ; Ci at boen mot de bone escole.

« Cuidiez-vos or que la croix preingne Et que je m’en voize outre meir, Et que les .c. soudées deingne Por .xl. cens réclameir ? Je ne cuic pas que Deux enseingne Que hom le doie ainsi semeir : Qui ainsi senme pou i veigne, Car hom les devroit asemeir. »

— « Tu naquiz de ta mère nuz, Dit li croiziez, c’est choze aperte : Or iez juqu’à cel tens venuz Que ta chars est bien recoverte. Qu’est Diex nès qu’alors devenuz Qu’à cent dobles vent la déserte ? Bien i ert por meschéanz tenuz Qui ferat si vilainne perte.

« Hom puet or paradix avoir Ligièrement ! Diex en ait loux ; Asséiz plus, ce poeiz savoir, L’acheta sainz Pière et sainz Poulz, Qui de si précieux avoir Com furent la teste et li coux, L’aquistrent, se teneiz à voir : Icist dui firent .ij. biaux coux. »

Dit cil qui de croizier n’a cure : « Je voi merveilles d’une gent Qui asseiz sueffrent poinne dure En amasseir .i. pou d’argent ; Puis vont à Roume ou en Esture, Ou vont autre voie enchergent : Tant vont cerchant bone aventure, Qu’il n’ont baesse ne sergent.

« Hom puet mult bien en cest payx Gaaignier Dieu cens grant damage ; Vos ireiz outre meir lays Qu’à folie aveiz fait homage. Je di que cil est foux nayx Qui ce mest en autrui servage, Quant Dieu puet gaaignier sayx Et vivre de son héritage. »

— « Tu dis si grant abusion Que nus ne la porroit descrire, Qui vues sans tribulation Gaaignier Dieu por ton biau rire ; Dont orent fole entencion Li saint qui soffrirent martyre Por venir à redempcion ? Tu dis ce que n’uns ne doit dire.

« Encor n’est pas digne la poingne Que n’uns hom puisse soutenir A ce qu’à la joie sovrainne Puisse ne ne doie venir : Par ce se rendent tuit cil moinne Qu’à teil joie puissent venir. Hom ne doit pas douteir essoinne C’on ait pour Dieu juqu’au fenir. »

— « Sire qui des croix sermoneiz, Resoffreiz-moi que je deslas. Sermoneiz ces hauz coroneiz, Ces grans doiens et ces prélaz, Cui Diex est toz abandoneiz Et dou siècle toz li solaz : Ciz geux est trop mal ordeneiz Que toz jors nos meteiz ès laz.

« Clerc et prélat doivent vengier La honte Dieu, qu’il ont ces rentes. Il ont à boivre et à mengier : Si ne lor chaut c’il pluet ou vente. Siècles est touz en lor dangier ; C’il vont à Dieu par teile sente, Fol sunt c’il la vuelent changier, Car c’est de toutes la plus gente. »

— « Laisse clers et prélaz esteir Et te pren garde au roi de France Qui por paradix conquesteir Vuet metre le cors en balance Et ces enfanz à Dieu presteir ; Li près n’est pas en esmaiance : Tu voiz qu’il ce vuet apresteir Et faire ce dont à toi tance.

« Mult a or meillor demoreir Li Rois el roiaume que nos, Qui de son cors vuet honoreir Celui que por Seignor tenons, Qu’en crois se laissa devoreir. Ce de lui servir ne penons, Hélas ! trop aurons à ploreir, Que trop fole vie menons ! »

— « Je vuel entre mes voisins estre Et moi déduire et solacier : Vos ireiz outre la meir peistre Qui poez grant fais embracier. Dites le soudant vostre meistre Que je pris pou son menacier : S’il vient desà, mal me vit neistre, Mais lai ne l’irai pas chacier.

« Je ne faz nul tort à nul home, N’uns hom ne fait de moi clamour ; Je cuiche tost et tien grant soume, Et tieng mes voisins à amour. Si croi, par saint Pierre de Roume, Qu’il me vaut miex que je demour, Que de l’autrui porter grant soume Dont je seroie en grant cremour. »

— « Desai bées à aise vivre, Seiz-tu se tu vivras asseiz ? Dis-moi ce tu ceiz en queil livre Certains vivres soit compasseiz. Manjue et boif et si t’enyvre, Que mauvais est de pou lasseiz ; Tuit sont .i., saches à délivre, Et vie d’oume et oez quasseiz.

« Laz ! ti dolant ! la mors te chace, Qui tost t’aura lassei et pris ; Desus ta teste tien sa mace : Viex et jones prent à .i. pris. Tantost at fait de pié eschace, Et tu as tant vers Dieu mespris ! Au moins enxui .i. pou la trace Par quoi li boen ont los et pris. »

— « Sire croiziez, merveilles voi ; Mult vont outre meir gent menue, Sage, large, de grant aroi, De bien metable convenue, Et bien i font, si com je croi, Dont l’arme est por meilleur tenue : Si ne valent ne ce ne quoi Quant ce vient à la revenue.

« Se Diex est nule part el monde, Il est en France, c’et sens doute ; Ne cuidiez pas qu’il se reponde Entre gent qui ne l’aimment goute. Et vostre meir est si parfonde Qu’il est bien droiz que la redoute ; J’aing mieux fontaine qui soronde Que cele qu’en estei s’esgoute. »

— « Tu ne redoutes pas la mort, Si seiz que morir te convient, Et tu diz que la mers t’amort !… Si faite folie dont vient ? La mauvistiez qu’en toi s’amort Te tient à l’osteil se devient ; Que feras se la mort te mort Que ne ceiz que li tenz devient ?

« Li mauvais desà demorront Que jà n’uns boens n’i demorra ; Com vaches en lor lit morront Buer iert neiz qui de lai morra, Jamais recovreir ne porront : Fasse chacuns mieux qu’il porrat ; Lor peresce en la fin plorront, Et c’il muerent n’uns n’es plorra.

« Ausi com par ci le me taille, Cuides foïr d’enfer la flame Et acroire, et metre à la taille, Et faire de la char ta dame. A moi ne chaut coument qu’il aille, Mais que li cors puist sauver l’âme, Ne de prison ne de bataille, Ne de laissier enfant ne fame. »

— « Biaux sire chiers, que que dit aie, Vos m’aveiz vaincu et maltei. A vos m’acort, à vos m’apaie, Que vos ne m’aveiz pas flatei. La croix preing sans nule délaie, Si doing à Dieu cors et chatei ; Car qui faudra à cele paie Mauvaisement aura gratei.

« En non dou haut Roi glorieux Qui de sa fille fist sa meire, Qui par son sanc esprécieux Nos osta de la mort ameire, Sui de moi croizier curieux Por venir à la joie cleire ; Car qui à s’ame est oblieux Bien est raisons qu’il le compeire. »