Ci encoumence de Charlot le Juif, qui chia en la pel dou lièvre

Qui ménestreil vuet engignier Mout en porroit mieulz bargignier ; Car mout soventes fois avient Que cil por engignié se tient Qui ménestreil engignier cuide, Et s’en trueve sa bource vuide : Ne voi nelui cui bien en chiée. Por ce devroit estre estanchiée La vilonie c’om lor fait, Garson et escuier sorfait, Et teil qui ne valent .ij. ciennes. Por ce le di qu’à Aviceinnes Avint, n’a pas .i. an entier, A Guillaume le penetier.

Cil Guillaumes dont je vos conte, Qui est à monseigneur le conte De Poitiers, chassoit l’autre jour I. lièvre qui ert à séjour. Mult durement se desrouta ; Li lièvres, qui les chiens douta, Asseiz foï et longuement, Et cil le chassa durement ; Asseiz corut, asseiz ala, Asseiz guenchi et sà et là, Mais en la fin, vos di-ge bien Qu’à force le prirent li chien. Pris fu sire coars li lièvres ; Mais li roncins en ot les fièvres, Et sachiez que mais ne les tremble, Escorchiez en fu, ce me cemble. Or pot cil son roncin ploreir Et mettre la pel essoreir ; La pel, se Diex me doint salu, Coûta plus qu’ele ne valu. Or laisserons esteir la pel, Qu’il la garda et bien et bel Jusqu’à ce tens que vos orroiz, Dont de l’oïr vos esjorroiz.

Partout est bien choze commune, Ce seit chascuns, ce seit chascune, Quant .i. hom fait noces ou feste Où il a gens de bone geste, Li menestreil, quant il l’entendent, Qui autre chose ne demandent, Vont là, soit amont, soit aval, L’un à pié, l’autres à cheval. Li couzins Guillaume en fit unes Des noces qui furent communes, Où asseiz ot de bele gent, Dont mout li fu et bel et gent : Asseiz mangèrent, asseiz burent ; Se ne sai-ge combien i furent Je méismes, qui i estoie. Asseiz firent et feste et joie. Ne vi piesà si bele faire, Ne qui autant me péust plaire.

Se Diex de ces biens me reparte, N’est si grant cors qui ne départe : La bonne gent c’est départie ; Chascuns s’en va vers sa partie. Li ménestreil trestuit huezei S’en vinrent droit à l’espouzei. N’uns n’i fu de parleir laniers : « Doneiz-nos maîtres ou deniers, Font-il, qu’il est drois et raisons ; S’ira chascuns en sa maison. »

Que vos iroie-je dizant, Ne me paroles esloignant ? Chascun ot maître, nès Challoz Qui n’estoit pas mult biauz valloz. Challoz ot à maître celui Qui li lièvres fist teil anui. Ces lettres li furent escrites, Bien saellées et bien dites ; Ne cuidiez pas que je vos boiz. Challoz en est venuz au bois, A Guillaume ces lettres baille ; Guillaume les resut cens faille, Guillaumes les commance à lire, Guillaumes li a pris à dire : « Challot, Charlot, biauz dolz amis, Vos estes ci à moi tramis Des noces mon couzin germain ;

Mais je croi bien, par saint Germain, Que vos cuit teil choze doneir, Que que en doie gronsonneir, Qui m’a coutei plus de .c. souz, Se je soie de Dieu assouz. » Lors a apelei sa maignie, Qui fu sage et bien enseignie. La pel d’un lièvre rova querre, Por cui il fist maint pas de terre ; Cil l’aportèrent à grant aleure, Et Guillaumes de rechief jure : « Charlot, se Diex me doint sa grâce, Ne se Dieux plus grant bien me face, Tant me coûta com je te di. » — « Hom n’en auroit pas samedi, Fait Charlos, autant au marchié, Et s’en aveiz mains pas marchié. Or voi-ge bien que marchéant Ne sont pas toz jors bien chéant. »

La pel prent que cil li tendi ; Onques grâces ne l’en rendi ; Car bien saveiz, n’i ot de quoi. Pencis le véissiez et quoi ; Pencis s’en est issus là fuer ; Et si pence dedens son cuer, Se il puet, qu’il li vodra vendre, Et li vendi bien au rendre. Porpenceiz c’est que il fera, Et coment il li rendera. Por li rendre la félonie, Fist en la pel la vilonie…

Vos savez bien ce que vuet dire. Arier vint et li dist : « Biau sire, Se ci a riens, si le preneiz. » — « Or as-tu dit que bien seneiz ? » — « Oïl, foi que doi Notre Dame. » — « Je cuit c’est la coiffe ma fame, Ou sa toaille, ou son chapel ; Je ne t’ai donei que la pel. » Lors a boutei se main dedens : Eiz-vos l’escuier qui ot gans Qui furent punais et puerri, Et de l’ouvrage maître Horri. Ensi fu .ij. fois conchiez : Dou ménestreil fu espiez Et dou lièvre fu mal bailliz, Que ces chevaus l’en fu failliz. Rutebuez dit, bien m’en souvient : « Qui barat quiert, baraz li vient. »

Explicit.