Ci encoumence la chansons de Puille

Qu’à l’arme vuet doner santei Oie de Puille l’errement ; Diex a son règne abandonei, Li sien le nos vont présentant Qui de la terre ont sarmonei. Quanques nos avons meserrei Nos iert par la croix pardonei : Ne refusons pas teil présent.

Jone gent, qu’aveiz enpencei ? De quoi vos iroiz-vos vantant ? Quant vos sereiz en viel aei Qu’ireiz-vos à Dieu reprouvant De ce que il vos a donei Cuer et force, et vie et santei ? Voz li aveiz le cuer ostei, C’est ce qu’il vuet tant seulement.

Au siècle ne sons que prestei Por veoir vostre efforcement ; Nos n’avons yver ne estei Dont aions asséurement : Si avons jà grant pièce estei, Et qu’i avons conquestei Dont l’arme ait nule séurtei ? Je n’i vois fors despérement.

Or ne soions désespérei, Crion merci hardiement, Car Dieux est plains de charitei Et piteuz juqu’au jugement ; Mais lors aura-il tost contei Un conte plein de grant durtei : « Venez, li buen, à ma citei ; Aleiz, li mal, à dampnement

Lors seront li fauz cuer dampnei Qui en cest siècle font semblant Qu’il soient plain d’umilitei Et si boen qu’il n’i faut noiant, Et il sont plain d’iniquitei ; Mais le siècle ont si enchantei C’om n’oze dire véritei Ce c’on i voit apertement.

Clerc et prélat qui aünei Ont l’avoir et l’or et l’argent, L’ont-il de lor loiaul chatei ? Lor pères en ot-il avant ? Et lorsque il sont trespassei, L’avoir que il ont amassei Et li ombres d’un viez fossei Ces .iij. chozes ont .i. semblant.

Vasseur qui estes à l’ostei, Et vos li bacheleir errant, N’aiez pas tant le siècle amei, Ne soiez pas si non-sachant Que vos perdeiz la grant clartei Des cielz qui est sanz oscurtei. Or varra-hon vostre bontei : Preneiz la croix, Diex vos atant.

Cuens de Blois, bien aveiz errei Par desai au tornoiement : Dieux vos a le pooir prestei, Ne saveiz com bien longuement. Montreiz-li se l’en saveiz grei, Car trop est plainz de nicetei Qui por .i. pou de vanitei Lairat la joie qui ne ment.