De Frère Denise

Li abis ne fet pas l’ermite ; S’uns hom en hermitage abite Et il en a les dras vestus, Je ne pris mie .ij. festus Son abit ne sa véstéure, S’il ne maine vie ausi pure Comme son abit nous démonstre ; Mès maintes genz font bele monstre Et merveilleux sanblant qu’il vaillent : Il sanblent les arbres qui faillent Qui furent trop bel au florir. Bien devroient tels genz morir A grant dolor et à grant honte. I. proverbe dist et raconte Que tout n’est pas or c’om voist luire : Por ce m’estuet ains que je muire Fere .i. ditié d’une aventure De la plus bele créature Que l’en puisse trover ne querre De Paris jusqu’en Engleterre ; Vous dirai comment il avint. Granz gentiz homes plus de .x. L’avoient à fame requise ; Mès ne voloit en nule guise Avoir ordre de mariage, Ainz a fet de son pucelage Veu à Dieu et à Nostre-Dame. La pucele fu gentil fame ; Chevaliers ot esté son père : Mère avoit, mès n’ot suer ne frère. Mult s’entr’amèrent, ce me sanble, La pucele et la mère ensanble. Frères Meneurs laianz hantoient Tuit cil qui par iluec passoient. Or avint c’uns en i hanta Qui la damoisele enchanta : Si vous dirai en quel manière. La pucele li fist proière Que il sa mère requéist Qu’en relégion la méist, Et il li dist : « Ma douce amie, Se mener voliiez la vie Saint François, comme nous feson, Vous ne porriiez par reson Faillir que vous ne fussiez sainte. » Et cele, qui fu jà atainte, Et conquise, et mate, et vaincue, Si tost comme ele ot entendue La reson du Frère Meneur, Si dist : « Se Diex me doinst honeur ! Si grant joie avoir ne porroie De nule riens comme j’auroie Si de vostre ordre pooie estre. De bone eure me fist Diex nestre Se g’i pooie estre rendue ! » Quant li Frères ot entendue La parole à la damoisele, Se li a dit : « Gentil pucele, Se me doinst Diex s’amor avoir, Se de voir pooie savoir Qu’en nostre ordre entrer vousissiez, Et que sanz fausser péussiez Garder vostre virginité, Sachiez en fine vérité Qu’en nostre ordre bien vous metroie. » Et la pucèle li otroie Qu’el gardera son pucelage Trestoz les jors de son éage. Atant li Frères la reçut ; Par sa guile cele deçut Qui à barat n’i entendi : Desus s’âme li desfendi Que riens son conseil ne déist, Mès si céelement féist Coper ses beles treces blondes Que jà ne le séust li mondes, Et féist rère estancéure, Et préist tele vestéure Comme à tel homme covendroit, Et qu’en tel guise venist droit En .i. leu dont il ert custodes. Cil, qui estoit plus faus qu’Hérodes, S’en part atant et li met terme ; Et cele a ploré mainte lerme Quant de li départir le voit. Cil qui la glose li devoit Fère entendre de la leçon L’a mise en male soupeçon. Male mort le praingne et ocie ! Cele tient toute à prophésie Quanques cil li a sermoné. Cele a son cuer à Dieu doné ; Cil refet du sien autel don Qui bien l’en rendra guerredon : Mult par est contrère sa pensse Au bon pensser où ele pensse ; Mult est lor penssée contrère, Car cele pensse à li retrère Et oster de l’orgueil du monde, Et cil, en qui pechié soronde, Qui toz art du feu de luxure, A mis sa penssée et sa cure A la pucele acompaignier Au baing où il se veut baignier, Où il s’ardra, se Diex n’en pensse, Que jà ne li fera deffense, Ne ne li saura contredire Chose que il li veuille dire. A ce vait li Frères penssant, Et ses compains en trespassant, Qui s’esbahist qu’il ne parole, Li a dite ceste parole : « Où pensez-vous, frère Symon ? » — « Je pens, fet-il, à .i. sermon, Au meilleur que je pensaisse oncques. » Et cil respont : « Or penssez donques ! » Frère Symons ne puet desfensse Metre en son cuer que il ne pensse A la pucele qui demeure ; Et cele désirre mult l’eure Qu’ele soit çainte de la corde : Sa leçon en son cuer recorde Que li Frères li a donée. Dedenz .iij. jors s’en est emblée De la mère qui la porta, Qui forment s’en desconforta. Mult fu à malaise la mère, Qu’el’ ne savoit où sa fille ère ; Grant dolor en son cuer demaine Trestoz les jors de la semaine, En plorant regrete sa fille ; Mès cele ne done une bille, Ainz pensse de li esloingnier. Ses biaus crins ot fet rooingnier : Comme vallet fu estancie Et fu de bons housiaus chaucie, Et de robe à homme vestue Qui estoit par devant fendue : Bien sambloit jone homme de chière ; Et vint en itèle manière Là où cil li ot terme mis. Li Frères, que li anemis Contraint et semont et argue, Ot grant joie de sa venue. En l’ordre la fist recevoir : Bien sot ses frères decevoir. La robe de l’ordre li done Et li fist fère grant corone ; Puis la fist au moustier venir. Bel et bien se sot contenir Et en cloistre et dedenz moustier, Et ele sot tout son sautier, Et fu bien de chanter aprise : O les autres chante en l’église Mult bel et mult cortoisement ; Mult se contient honestement. Or ot damoisele Denise Quanqu’ele vout à sa devise. Oncques son non ne li muèrent ; Frère Denise l’apelèrent, Frère Denise mult amèrent Tuit li Frère qui léenz èrent ; Mult plus l’amoit frères Symons. Sovent se metoit ès limons, Com cil qui n’en ert pas retrais, Et il s’i amoit miex qu’ens trais : Mult ot en lui bon limonier. Vie menoit de pautonier, Et ot lessié vie d’apostre. A cele aprist sa patrenostre, Qui volontiers la retenoit. Parmi le païs la menoit ; N’avoit d’autre compaignon cure : Tant qu’il avint par aventure Qu’il vindrent chiés .i. chevalier Qui ot bons vins en son celier, Qui volentiers lor en dona ; Et la dame s’abandona A regarder frère Denise : Sa chière et son samblant avise ; Aparcéue s’est la dame Que frère Denise estoit fame. Savoir veut se c’est voirs ou fable : Quant l’en ot fet oster la table La dame, qui bien fu aprise, Prist par la main Frère Denise. A son seignor prist à sorrire ; En souriant li dist : « Biaus sire, Alés-vous là defors esbatre, Et fesons .ij. pars de nous .iiij. : Frère Symon o vous menez, Frère Denise est assenez De ma confession oïr. » Lor n’ont talent d’els esjoïr : Li Cordelier dedens Pontoise Vousissent estre ; mult lor poise Que la dame de ce parole ; Ne leur plut pas ceste parole, Quar paor ont d’apercevance. Frère Symons vers li s’avance, Puis li dist quant de li s’apresse : « Dame, à moi vous ferez confesse, Quar cil Frères n’a pas licence De vous enjoindre pénitence. » Et ele respondi : « Biaus sire, A cestui vueil mes pechiez dire Et de confession parler. » Lors l’a fet en sa chambre aler, Et puis clot l’uis et bien le ferme ; Avoec li dant Denise enferme, Puis li a dit : « Ma douce amie, Qui vous conseilla tel folie D’entrer en tel relégion ? Si me doinst Diex confession Quant l’âme du cors partira, Que jà pis ne vous en sera Se vous la vérité me dites. Si m’aït li Sains-Espérites, Bien vous poez fier en moi. » Et cele, qui ot grant esmoi, Au miex que pot de ce s’escuse ; Mès la dame la fist concluse Par les resons qu’el li sot rendre, Si que plus ne se pot desfendre. A genillons merci li crie, Jointes mains ü requiert et prie Qu’ele ne li face fère honte, Et puis de chief en chief li conte Que il l’a trest de chiés sa mère, Et se li conta qui ele ère, Si que riens ne li a celé. La dame a le Frère apelé, Puis li dist devant son seignor Si grant honte c’onques greignor Ne fu mès à nul homme dite : « Faus papelars, faus ypocrite, Fausse vie menez et orde. Qui vous pendroit à vostre corde Qui est en tant de lieus noée, Il auroit fet bone jornée. Tels genz font bien le siècle pestre Qui par dehors samblent bons estre Et par dedens sont tuit porri ! La norrice qui vous norri Fist mult mauvèse norreture, Qui si très belle créature Avez à si grant honte mise ! I. tel ordre, par saint Denise ! N’est mie biaus, ne bons, ne genz. Vous desfendez aus bones genz Et les dansses et les caroles, Vièles, tabors et citoles, Et déduis de ménesterez : Or, me dites, sire haus rez, Mena saint Françoys tele vie ? Bien avez honte déservie Comme faus trahitre prové, Et vous avez mult bien trové Qui vous rendra vostre déserte ! » Lors a une grant huche ouverte Por metre le frère dedenz ; Et frère Symons tout adenz Lez la dame se crucefie ; Et li chevaliers s’umélie, Qui de franchise ot le cuer tendre, Quant celi vit en crois estendre, Si le liève par la main destre : « Frère, fet-il, volez-vous estre De cest afère tot délivres ? Porchaciés-nous jusqu’à .c. livres A marier la damoisele. » Quant li Frères ot la novele, Oncques n’ot tel joie en sa vie. Lors a sa fiance plevie Au chevalier des deniers rendre ; Bien les rendra sanz gage vendre : Auques set où il seront pris. Atant s’en part, congié a pris. La dame, par sa grant franchise, Retint damoisele Denise, C’onques de riens ne l’esfroia, Mès mult durement li proia Qu’ele fust trestoute séure Que jà de nule créature Ne sera son secré séu, Ne qu’ele ait à homme géu, Ainçois sera bien mariée ; Choisisse en toute la contrée Celui que miex avoir voudroit, Ne mès qu’il fust de son endroit. Tant fist la dame envers Denise Qu’ele l’a en bon penssé mise : Ne l’a servi mie de lobes. Une de ses plus beles robes Devant son lit li aporta : A son pooir la conforta Com cele qui ne se faint mie. El li a dit : « Ma douce amie, Ceste vestirez-vous demain. » Ele-méisme de sa main La vest ainçois qu’ele couchast : Ne soufri pas qu’autre i touchast, Quar privéement voloit fère Et cortoisement son afère, Que sage dame et cortoise ère. Privéement manda la mère Denise par .i. sien message. Mult ot grant joie en son corage Quant ele ot sa fille véue, Qu’ele cuidoit avoir perdue ; Mès la dame li fist acroire Et par droite vérité croire Qu’ele ert aux Filles-Dieu rendue, Et qu’à une autre l’ot tolue Qui .i. soir léenz l’amena, Que por pou ne s’en forsena. Que vous iroie-je contant Ne leur paroles devisant ? Du rioter seroit néenz ; Mès tant fu Denise léenz Que li denier furent rendu. Après n’ot guères atendu Qu’el’ fu à son gré assenée : A .i. chevalier fu donée Qui l’avoit autrefoiz requise. Or ot non madame Denise, Et fu à mult plus grant honor Qu’en abit de Frère Menor.