Inquiétudes

D'Où vient qu’vn penser indiscret M’entretien tousiours en secret D’vn sujet qui m’est si contraire : Et conuaincu de trahison, Ne sçauroit iamais se distraire De me presenter du poison ?

Quel doux & cruel mouuement Veut rendre ainsi de mon tourment Mes volontez mesmes complices ? Et flatant de nouueaux desirs Souz l’apparance des delices, Me déguise les desplaisirs ?

Apres tant de regrets confus, Et tant d’aiguillons apperceus Souz le trompeur esclat des Roses, Suis-ie bien assez mal-heureux, Pour permettre aux plus belles choses De me rendre encore amoureux ?

Apres tant de viues douleurs, Apres tant de sang & de pleurs Que i'ay versez dessus ma flame ; Auray-ie l'indiscretion De liurer encore mon Ame Au pouuoir de ma paßion ?

Ô prudente & forte Raison ! Qui m'as tiré d'vne prison Où ie respandois tant de larmes ; Ie n'ay recours qu'à ta bonté, Veille encore prendre les armes Pour deffendre ma liberté.

I'apperçois desia mon trespas Couuert des innocens appas Que Philis sçait mettre en vsage ; Philis, ce chef-d'œuure des Cieux, Qui n'a de dovceur qu'au visage, N'y d'amour que dans ses beaux yeux.

Ô ! Raison, celeste flambeau Acheue vn ouurage si beau : Mais quoy, tu perds ceste victoire, Et mal-gré tes sages propos, L'obiect qui regne en ma memoire Vient encore troubler mon repos ?