La belle malade

AMOVR ie t’auertis qu’vne fieure cruelle Est preste d’enuoyer Phillis dans le tombeau, Et c’est vn bruit commun que tu vas perdre en elle, Tout ce que ton Empire eut iamais de plus beau.

La neige de son corps se resoût toute en eau ; Tempere son ardeur du doux vent de ton aisle, Et luy serrant le front auecque ton bandeau, Hausse de ton carquois le cheuet de la belle.

Mais s’il faut que la mort vienne pour l’assaillir Amour, fais qu’elle puisse heureusement faillir, Change son dard funeste en vn doux traict de flame.

Afin qu’executant vn coup si hazardeux, Lors qu’elle percera le beau sein de Madame Pensant perdre vne vie, elle en conserve deux.